Ад змрочных трукраймаў да камедыйных роўдмуві: 10 крымінальных серыялаў на розны густ

Часам змрочнае і жахлівае можа не толькі адштурхоўваць, але і выклікаць цікавасць — такі парадокс чалавечай псіхікі. Для тых, хто пасля цяжкага працоўнага дня любіць адпачыць і паглыбіцца ў разгадванне кіназагадак, мы склалі падборку дэтэктыўных серыялаў.

---

«Сапраўдны дэтэктыў» (True Detective) 

Першыя два сезоны сталі вельмі паспяховымі. І гэта не дзіўна: фільм прадуманы да дробязяў: ад па-майстэрску падабранага акторскага складу да музыкі і мастацкіх рашэнняў у кадры. 

Апошні сезон, які выйшаў у гэтым годзе, трохі адрозніваецца ад першых: у ім стала больш містыцызму. Дзеянні разгортваюцца на Алясцы ў разгар палярных начэй: маленькі гарадок апускаецца ў апраметную цемру, а сярод гэтага змроку пачынаюць здарацца загадкавыя смерці, якія павінны раскрыць галоўныя гераіні: дэтэктыў і яе памочніца. У фільме нададзена шмат увагі таксама карэнным народам: іх традыцыям і павер’ям, што дадае асаблівы каларыт.

«Ты» (You)

Рэжысёры: Лі Петрыя, Грэг Берланці, Сержыа Урэка
Гады: 2018-2023 (1-4 сезон)

Яшчэ адзін серыял, апошні сезон якога выйшаў адносна нядаўна. «Ты» — гэта гісторыя псіхапата-сталкера па імені Джо, які апантаны адной ідэяй — знайсці жанчыну сваёй мары. Джо ўважліва вывучае сваіх выбранніц перад тым, як пазнаёміцца: сочыць за іх сацыяльнымі сеткамі, запамінае, з кім яны кантактуюць, і ліквідуе канкурэнтаў, калі такія зʼяўляюцца ў яго на шляху. Але з дзяўчатамі ў яго ўсё роўна не складваецца — яны то расчароўваюць яго, то загадкава знікаюць.

У чацвёртым сезоне Джо зʼязджае ў Лондан, уладкоўваецца выкладчыкам літаратуры і вырашае больш ніколі не заводзіць стасункаў з жанчынамі, бо яны, як ён думае, штурхаюць яго на злачынствы. Але вось аднойчы ён трапляе на вечарыну да багатых ангельцаў, моцна напіваецца, а на раніцу аднаго з гасцей знаходзяць мёртвым. Выглядае ўсё амаль як у класічным англійскім дэтэктыве, які Джо ненавідзіць. Тым больш мужчына ўпэўнены, што забойца не ён…

 

«Монстр: Гісторыя Джэфры Дамера» (Monster: The Jeffrey Dahmer Story)

Трукрайм, ад якога кроў стыне ў жылах. Джэфры Дамер — серыйны маньяк, які забіваў у перыяд з канца 1970-х да пачатку 1990-х у ЗША. Ахвярамі Дамера станавіліся маладыя мужчыны: ён знаёміўся з імі ў барах і гей-клубах, а затым клікаў у госці ці ў гатэль, дзе здзяйсняў злачынствы.

Серыял распавядае гісторыю маньяка: ад яго дзяцінства, дзе ён пачаў праяўляць садысцкія схільнасці, да тых гадоў, калі ён пачаў забіваць хлопцаў.

Важны пласт у серыяле — гэта становішча гей-супольнасці ў тыя гады ў Амерыцы. Паліцыя відавочна ставіцца да іх з насмешкай і ігнаруе праблемы гэтай групы людзей, што дае шанец злачынцу заставацца непакараным. 

«Покер Фэйс» (Poker Face)

У Чарлі Кейл ёсць асаблівы дар — яна ўмее вызначаць, калі чалавек хлусіць. Аднойчы яе сяброўка, з якой яны разам працавалі, памірае. Забойства прыпісваюць мужу ахвяры, хатняму тырану, але Чарлі ўпэўненая: у гэтым злачынстве замяшаны ўладальнік казіно — іх шэф. Дзяўчына выкрывае злачынца, але ўсведамляе, што спакойнае жыццё ёй не свеціць. Яна вымушана бегчы, пераязджаючы з горада ў горад, каб мсціўцы не знайшлі яе, і адначасна расследуе яшчэ некалькі злачынстваў.

Кожная серыя прысвечана пэўнаму пласту амерыканскага грамадства: ад заможнай эліты да 30-гадовых няўдачнікаў-металістаў, правінцыйных рэднэкаў і нават састарэлых хіпі. Аўтару ўдалося па-майстэрску абʼяднаць жанр дэтэктыва з роўдмуві і іранічнай камедыяй.

«Паляўнічы за розумам» (Mindhunter)

Холдэн Форд працуе ў ФБР і спецыялізуецца на перамовах са злачынцамі, якія захапілі закладнікаў. Аднойчы ён сутыкаецца з няўдачай і вырашае пагрузіцца ў псіхалогію: пачынае складаць партрэт злачынца на аснове ўскосных даных, каб прадбачыць яго дзеянні.

Разам са сваім калегам-біхевіярыстам ён адпраўляецца ў амерыканскія турмы, каб сустрэцца з вядомымі злачынцамі і зразумець, што іх падштурхнула да здзяйснення жахлівых учынкаў. Серыял можа спадабацца тым, хто цікавіцца псіхалогіяй і псіхіятрыяй. У ім разглядаюцца рэальныя кейсы: напрыклад, у адным з эпізодаў Форд бярэ інтэрвʼю ў стваральніка вядомай секты Чарльза Мэнсана.

«Грэшніца» (Sinner)

У серыяле «Грэшніца» дэтэктыў Гары Эмброуз расследуе незвычайныя злачынствы. Аднойчы маладая маці раптам забівае на вачах у свайго ашаломленага мужа незнаёмага мужчыну. Жанчыну адпраўляюць на лячэнне ў псіхіятрычную бальніцу, дзе яна пачынае ўспамінаць пра сваё мінулае...

У іншым эпізодзе распавядаецца гісторыя хлопчыка-падлетка, які падсыпае атрутную расліну ў гарбату сваім бацькам. Узнікае пытанне: чаму дзіця вырашыла здзейсніць такі жудасны ўчынак, і ці вінаваты ён на самой справе? Дэтэктыў Гары Эмброуз бярэцца за расследаванне, спрабуючы знайсці адказы на гэтыя пытанні.

«Змей» (Serpent)

Брытанскі серыял пра харызматычнага маладога чалавека Алена Гацье, які прыязджае ў Тайланд у 1970-я гады. На першы погляд, яго жыццё здаецца бестурботным і поўным свабоды, уласцівай той эпосе: ён здымае кватэру ў Бангкоку і ладзіць вечарынкі, куды збіраюцца хіпі-турысты з Еўропы.

Але на самой справе ў Гацье на гасцей свае планы: ён мэтанакіравана выбірае сваіх ахвяр з заможных сем’яў, рабуе іх і забівае. Серыял заснаваны на рэальных падзеях і распавядае пра жыццё злачынца Чарльза Сабраджа.,

«Вяршыня возера» (Top of the Lake)

Дэтэктыў Робін (якую грае Элізабэт Мос, вядомая па фільме «Аповед служанкі») вяртаецца ў свой родны горад у Новай Зеландыі, дзе расследуе знікненне дзяўчынкі-падлетка. Гэта справа ёй моцна адгукаецца, бо яна пацярпела ад гвалту, калі была прыкладна ў тым жа ўзросце, што і зніклая. Робін трэба будзе не толькі раскрыць злачынства, але перажыць рэтраўматызацыю свайго страшнага досведу і разабрацца з прывідамі мінулага 

У гэтым маленькім і каларытным мястэчку кожны жыхар хавае свае таямніцы: грубаватыя землеўладальнікі, якія гандлююць наркотыкамі, жанчыны, якія жывуць у настальгіі па культуры хіпі, і разгубленыя падлеткі, пазбаўленыя даверу сваіх сем’яў.

«Монстр» (Monstr)

«Монстр» — карэйскі дэтэктыў, які сумяшчае элементы трылера і псіхалагічнай драмы. Малады і амбіцыйны Хан Джу Вунь прыязджае з Сеула ў невялікі горад. Яму ў напарнікі ставяць некалі вядомага следчага, якога панізілі і цяпер ён працуе памочнікам інспектара — Лі Дон Сіка.

Нечакана ў горадзе пачынаюць адбывацца серыйныя забойствы. Паміж паліцэйскімі ўзнікаюць канфлікты — Лі Дон Сік не прызнае начальніка, які відавочна менш дасведчаны, чым ён. А Хан Джу Вунь і зусім лічыць, што ў яго калегі не ўсё добра з псіхікай... а можа, ён і ўвогуле забойца? 

«Злачынства» (Crime)

Ірвін Уэлш, аўтар культавага рамана «На ігле», экранізаваны ў аднайменным фільме, напісаў сцэнар да дэтэктыўнага серыяла «Злачынства». У гэтым фільме галоўны герой, інспектар Рэй Ленакс, падобна шматлікім персанажам з твораў Уэлша, пакутуе на наркатычную залежнасць. Аднак гэта не перашкодзіла яму стаць выбітным дэтэктывам, асабліва калі справа тычыцца выкраданняў нявінных дзяцей маньякам на белым фургоне.

Акцёр Дугрэй Скот, які выканаў ролю дэтэктыва Рэя Ленакса, за сваю працу ў серыяле атрымаў Міжнародную прэмію «Эмі».

М. К., Budzma.org