«Вандруй. Адчуй. Натхняйся» — акцыя пад такой назвай будзе праходзіць па ўсё Беларусі з 5 па 11 чэрвеня 2023 года. Удзельнічаць будуць музеі, культурныя цэнтры, установы адукацыі, аграсядзібы, турыстычныя комплексы, экалагічныя паркі — агулам каля 800 розных аб’ектаў. Так што выбар сапраўды вялікі.
Арганізатары акцыі — Міністэрства спорту і турызму Рэспублікі Беларусь і Нацыянальнае агенцтва па турызме.
Што прапануецца
У перыяд акцыі аб’екты па ўсёй Беларусі прапануюць наведвальнікам:
бясплатныя экскурсіі і квэсты;
дні адчыненых дзвярэй;
майстар-класы;
дэгустацыі страў нацыянальнай кухні;
прэзентацыі паслуг і спецыяльныя прапановы.
Цікавосткі
Удзельнікі акцыі абяцаюць безліч разнастайных мерапрыемстваў. Вось толькі некаторыя, што падаліся нам цікавымі і якія мы раім па магчымасці наведаць
5 чэрвеня «Музей-сядзіба Пружанскі палацык» ладзіць бясплатную экскурсію (г. Пружаны, вул. Савецкая, д. 50);
з 5-га па 10-га чэрвеня Пінскі кафедральны касцёл запрашае на бясплатную экскурсію па былому манастыру францысканцаў (г. Пінск, вул. Леніна, 16);
6-га чэрвеня — бясплатны ўваход у музей і зборная бясплатная экскурсія ў Доме-музеі Марка Шагала з 11.00 да 12.00. А таксама, бясплатны ўваход у музей і зборная бясплатная экскурсія ў Арт-цэнтры Марка Шагала з 14.00 да 15.00;
з 6-га па 9-га чэрвеня «Гомельскі палацава-паркавы ансамбль» запрашае на бясплатныя экскурсіі;
6-га і 7-га чэрвеня можна наведаць экспазіцыю Паўночнай вежы Гальшанскага замка;
7-га чэрвеня можна бясплатна наведаць экскурсію па палацаваму комплексу ў Ружанах (г.п. Ружаны, вул. Урбановіча, 15а) альбо наведаць «Музей беларускага Палесся» (г. Пінск, пл. Леніна, 22).
Як патрапіць на экскурсіі
Падрабязны пералік аб’ектаў, якія ўдзельнічаюць у акцыі, можна спампаваць ці азнаёміцца з ім тут. У табліцы ёсць магчымасць адсартаваць аб’екты па вобласці, тыпе арганізацыі.
Каб патрапіць на экскурсіі ці іншыя мерапрыемствы, трэба абавязкова папярэдне запісацца па тэлефонах, якія ўказаны насупраць кожнага ўдзельніка акцыі ўсё ў той жа табліцы.
Прыемных вандровак!
Ноч музеяў
А пакуль чэрвень не надышоў, зусім неабавязкова сядзець дома ў чаканні бясплатных экскурсій. Ужо заўтра па ўсёй Беларусі стартуе міжнародная акцыя «Ноч музеяў». Гэта доўгачаканая падзея, да якой кожны музей стараецца падрыхтаваць нешта асаблівае. У музеях Беларусі будзе адбывацца процьма мерапрыемстваў. Каб вам прасцей было сарыентавацца, мы зрабілі падборку самых цікавых прапановаў.
Ноч музеяў 2023 у Беларусі: куды схадзіць і што паглядзець
