7-10 снежня 2015 года ў Мінску пройдуць «Дэбаты аб Еўропе» – серыя дыскусій з удзелам прадстаўнікоў Беларусі, Германіі, Украіны, Расіі, Эстоніі, Босніі ды Герцагавіны, Даніі, Швецыі, Аўстрыі.
Мы абмяркоўваем шэраг важных для Беларусі тэм, разглядаючы іх у агульнаеўрапейскім кантэксце:
– Якім чынам мы сёння гаворым аб нацыі і нацыяналізме?
– Нацыянальная супольнасць і нацыянальнае ўключэнне (досвед людзей ды супольнасцей з рознай ідэнтычнасцю на фоне спробаў стварэння адзінага нацыянальнага праекта).
– Якія сённяшнія каштоўнасці ды практыкі здольны аб’яднаць людзей у сучасных грамадствах на тэрыторыі Еўропы (у тым ліку і па-за яе межамі). Якое значэнне мае сярод гэтых практык і каштоўнасцей ідэя нацыі?
– Якое месца займаюць Расія і Еўропа сярод нашых уяўленняў аб нацыянальных праектах?
Удзельнікі дыскусіі ад Беларусі прадстаўляюць розныя супольнасці ды ініцыятывы (тэатральная і ўрбаністычная супольнасці, фемінісцкі рух, ЛГБТ-інцыятывы, літаратурная і акадэмічная супольнасці) і розныя рэгіёны краіны.
Фінальная публічная дыскусія «Розныя досведы ідэнтычнасці – адна нацыя?» адбудзецца 9 снежня (серада) а 18.30 у прасторы EventSpace (вул. Кастрычніцкая, 16а). Уваход вольны.
Адна з мэтаў дыскусіі – разгляд беларускай сітуацыі на фоне падзей ў іншых краінах Еўропы (раз’яднанне Украіны ці выпрабаванне Германіі бежанцамі), пошук важных для грамадства каштоўнасцяў ды ідэй, здольных пераадолець межы традыцыйных уяўленняў аб нацыянальнай ідэнтычнасці і нацыі.
У дыскусіі возьмуць удзел: Валянцін Акудовіч (Беларусь), Ірына Саламаціна (Беларусь), Інга Петц (Германія) і Барыс Херсонскі (Украіна). Мадэратары – Вольга Шпарага і Аляксей Братачкін (Беларусь).
На пачатку фінальнай дыскусіі будзе прадстаўлены матэрыял трохдзённых абмеркаванняў адзначаных пытанняў.
Мерапрыемства ў Facebook
***
Праграма «Дэбаты аб Еўропе» створана ў 2012 годзе пры падтрымцы фонда S. Fischer Stiftung, Нямецкай акадэміі мовы і паэзіі і дабрачыннага фонду культуры Allianz Kulturstiftung (Германія). Суарганізатар з беларускага боку – European College of Liberal Arts in Belarus (ECLAB).
«Дэбаты аб Еўропе» падтрымліваюцца Міністэрствам замежных спраў ФРГ.
Інфармацыйная падтрымка – сетка інтэлектуальных часопісаў Eurozine і Альманах сучаснае беларускае культуры pARTisan.
Пры партнёрскай падтрымцы Інстытута імя Гётэ ў Мінску.
