Зміцер Вайцюшкевіч,  Зміцер Бартосік, Ілё энд Фрэндс, Алесь Кабзар і ўпершыню Юры Несцярэнка – гэта толькі некаторыя вядомыя прозвішчы, якія выступяць на ўжо 16 фэстывалі “Бардаўская восень”, які сёння стартуе ў Бельскім Доме культуры.

Паводле арганізатара мерапрыемства Ігара Лукашука, сёлетні фэстываль працягнецца 3 дні і пачнецца з конкурснай часткі:

– Журы ў нас знакамітае – гэта дырэктар Ліцэя з Беларускай мовай навучання  Андрэй Сцепанюк, Зміцер Вайцюшкевіч і Міхась Анемпадыстаў. Фэстываль пачынаецца 23 кастрычніка ў Бельскісм Доме культуры з конкурснай часткі, пасля адбудуцца канцэрты Ілё энд фрэндс,  Зміцера Вайцюшкевіча і акустычны канцэрт НРМ. Найбольш музычна насычаным днём будзе субота.

У гэты дзень чакаецца  некалькі канцэртаў ў розных падляшскіх гарадах, напрыклад, у Орлі, у Бельску-Падляшскім ў мясцовай Ратушы, у Гайнаўцы ў Музеі беларускай культуры, у Тэрэмісках ў памяшканні  Народнага унівэрсытэта і ў Гарадку ў мясцовым Доме культуры. У нядзелю пройдзе канцэрт ў беластоцкім кінатэатры “Форум”, дзе і будуць абвешчаны вынікі конкурснай часткі.

У конкурснай частцы “Бардаўскай восені” выступяць наступныя выступоўцы, якія прайшлі адбор у Менску:

Дзяніс Філіпенка
Міхаіл Бараноўскі
Паша Кузіч
Re1ikt
Рэбус Нялішніх
ZnaRock
Сьпелае сьвітаньне
Сьвятаслаў Ліпень

Уваход на усе канцэры свабодны. Непасрэдная трансляцыя з фэстываля “Бардаўская восень– 2009” на хвалях нашага радыё ўжо сёння ў 18:05 па польскім часе (19:05 па беларускім), з канцэрта лаўрэатау ў нядзелю 25 кастрычніка пачатак у 15:05 па польскім часе (16:05 па беларускім).

Тэгі: Беласток, Бельск-Падляшскі, Гайнаўка, Гарадок, Польшча