Выстаўка “З любоўю да роднага краю” працуе ў раённым краязнаўчым музеі.
На працягу паўтара месяца жыхары і госці Валожына змогуць ацаніць прыгажосць і гармонію беларускай прыроды, гарадскіх пейзажаў, цікавых нацюрмортаў, паведамляе 18 студзеня сайт газеты «Працоўная слава».
Мастак нарадзіўся ў 1949 годзе ў Магілёве. Пасля заканчэння Віцебскага педагагічнага інстытута выкладаў выяўленчае мастацтва ў школах і педуніверсітэце імя М. Танка. Удзельнічаць у выстаўках пачаў з 2002 года. Зараз працуе ў Нацыянальным мастацкім музеі Беларусі. Работы Мікалая Мішчанкі папаўняюць прыватныя калекцыі Беларусі, Расіі, Украіны, Польшчы, Германіі, выстаўляюцца ў галерэях.
Мікалай Мішчанка – прыхільнік традыцыйнай мастацкай школы. Ён імкнецца перадаць на палатне ўсю прыгажосць навакольнага свету. Яго жывапіс насычаны яркімі фарбамі, золатам сонца і святла.
На выстаўцы можна пабачыць карціны, выкананыя рознай алейнай тэхнікай. Аб’ядноўвае іх адно – замілаванне вобразамі роднага краю.
