12 жніўня фестываль «Класіка ля Ратушы з velcom» працягнецца новым арыгінальным канцэртам. Гэтым разам мінчан і гасцей сталіцы чакае сустрэча з творамі беларускай класікі. А самі гледачы змогуць даказаць, што беларуская зямля багатая на таленавітых людзей, вызначыўшы ўласны тып спеўнага голасу.

«Пасля кірмашу», «Вясновая казка», «Апошняе лета дзяцінства», «Саша-Сашанька», «Траянскі конь», «Тры вясёлыя сцэны», «Леташняя кадрыль», «Дзікае паляванне караля Стаха» — усе гэтыя разнапланавыя фільмы, знятыя ў 60-70-я гг. мінулага стагоддзя, аб’ядноўваюць два яркія факты: па-першае, яны былі створаныя на кінастудыі «Беларусьфільм», а па-другое, для кожнага з іх была напісаная цудоўная музыка — і яе аўтарам стаў выбітны беларускі кампазітар, народны артыст СССР і БССР Яўген Глебаў. Як многія з гэтых стужак увайшлі ў залаты фонд беларускага кінематографа, так і кінамузыка Я. Глебава стала здабыткам нацыянальнай беларускай культуры.

У першым аддзяленні канцэрта «Беларуская рапсодыя», які пройдзе 12 жніўня перад Мінскай гарадской ратушай, ансамбль «Мінск-Класік» пад кіраўніцтвам Максіма Расохі выканае найлепшыя творы Яўгена Глебава для кінематографа.

Працягнуць праграму канцэрта творы, напісаныя беларускімі кампазітарамі для музычнага тэатра, у выкананні салістаў і музычнай капэлы «Санорус» пад кіраўніцтвам Марыны Траццяковай. Жанчына за дырыжорскім пультам — з’ява больш чым рэдкая не толькі ў беларускай, але і ў сусветнай музыцы. У цяперашні час Марына Траццякова — адзіная ў Беларусі жанчына-дырыжор, якая працуе з прафесійнымі калектывамі. Сярод іх — сімфанічны аркестр Нацыянальнага акадэмічнага Вялікага тэатра оперы і балета Рэспублікі Беларусь, Дзяржаўны акадэмічны сімфанічны аркестр Рэспублікі Беларусь, аркестр Беларускага дзяржаўнага акадэмічнага музычнага тэатра і, вядома ж, музычная капэла «Санорус».

Пачынаючы з 20:00 і на працягу ўсяго канцэрту на пляцоўцы перад Мінскай гарадской ратушай ўсіх ахвочых будуць чакаць прамоўтары з планшэтамі, якія дапамогуць прайсці тэставанне на вызначэнне тыпу спеўнага голасу і абвесцяць вынік. Гледачам дастаткова будзе проста вымавіць або праспяваць пару фраз — і даведацца свой тып: тэнар, барытон або бас, сапрана, мецца-сапрана або кантральта. Для гэтага пры актыўным садзейнічанні кампаніі velcom была распрацаваная спецыяльная праграма.

Як і ўсе мерапрыемствы трэцяга сезона «Класікі ля ратушы з velcom», канцэрт «Беларуская рапсодыя» пачнецца ў 20:30.