Дызайнер, паэт і мастак з Мінска Павел Дарохін стварыў серыю альтэрнатыўных вокладак для класічных твораў беларускай літаратуры пад назвай #літвініл. У якасці асновы ён узяў вядомыя вокладкі заходніх музычных рок-гуртоў, такіх як Joy Division і Nirvana, якія самі ўжо даўно сталі класікай.
Вось што Павел распавёў нам пра канцэпцыю “літвінілу”:
“Прыдумаў я гэта, калі ехаў з Федзем Жывалеўскім з гурта “Голая Манашка” ў электрычцы на станцыю Пруды. Ён сказаў, што збіраецца пайграць у клубе “Re:Public” на паказе фільма пра Joy Division. Ну і я згадаў найбольш вядомую іх вокладку, якую яны таксама наўпрост узялі з адной энцыклапедыі. І чамусьці ўявіў, што гэта людзі на балоце. Дома дамаляваў чалавечкаў і змяніў надпіс. Так узнік канцэпт.
Вокладкі я яшчэ з дзяцінства люблю, бо ў бацькі багатая дыскаграфія – і вінілу, і кампакт-дыскаў. Ну і плюс мастацкая адукацыя. А цяпер культура вокладкі не тое, каб зусім сыходзіць (як і культура плаката, якім я займаюся ў Беларускім саюзе дызайнераў), але цалкам перафарматуецца ў наш век інтэрнэту.
Да таго ж дудлы – розныя дамалёўкі – вельмі інтэрактыўная рэч, якая выступае ў якасці гульні з адкрытым удзелам”.
Ідэю Паўла сумясціць літаратурную і рокавую класіку падхапіў журналіст Аляксандр Арсёнаў, які таксама зрабіў шэраг вокладак.
Далучайцеся і вы!
КК
