Сямейны інклюзіўны тэатр “і” быў створаны два гады таму і за гэты час не толькі паставіў некалькі паспяховых спектакляў, але нават атрымаў узнагароду за найлепшы драматычны спектакль на конкурсе “Скрыжаванні. Мінск”.

Фота kp.by

“Што такое праца ў інклюзіўным тэатры? — разважае мастацкі кіраўнік Ірына Пушкарова. — У нас цяпер 76 акцёраў, 26 з іх — з асаблівасцямі. Наша задача — паказаць бацькам, што дыягназ — гэта не так страшна. У нас ёсць дзеці са складанымі дыягназамі, аднак вельмі таленавітыя. Мы часам самі здзіўляемся, наколькі асаблівае дзіця можа змяніцца за год. Спярша ён баіцца нават выйсці на сцэну, а праз год вядзе дыялог з публікай”.

Да 2 красавіка, у Дзень інфармавання пра праблемы аўтызму, тэатр прадставіць новую пастаноўку — спектакль “Дрэва казак”.

“Тым разам мы адышлі ад мюзікла, больш простага жанру, са спевамі і танцамі, у бок складанейшай драматычнай формы. Гэта некалькі навелаў пра дабро, сяброўства і вечныя каштоўнасці. Менавіта з гэтым спектаклем мы і атрымалі другое месца на “Скрыжаванні”, але вышэйшых балаў ніхто не набраў”.
“Нам тэатр вельмі дапамог, — кажа маці аднаго з акцёраў Міхаіла Арцемчука. — Калі мы даведаліся, што ў Мішы ёсць асаблівасці, мы сутыкнуліся з шэрагам выпрабаванняў і жыццём ад кансультацыі да кансультацыі. Мы падтрымліваем Мішу як можам, ён навучыўся чытаць, але адразу словамі, не ведаючы літар. А пасля мы прыйшлі ў тэатр “і” і проста бачым, як Міша змяняецца на вачах, там цудоўная сяброўская атмасфера”.

2 красавіка спектакль “Дрэва казак” будзе прэзентаваны ў Рэспубліканскім палацы культуры ветэранаў. Пастаноўку падтрымала кампанія velcom, якая не першы год займаецца дапамогай асаблівым дзецям.

“Да таго ж 2 красавіка мы запускаем акцыю “Таксі дабрыні”, — кажа прадстаўніца кампаніі Дар’я Пракаповіч. — З 12-й да 16-й гадзіны па Мінску будзе курсіраваць 86 аўтамабіляў кампанііі “Сталіца 135”, якія будуць вазіць пасажыраў бясплатна. Усяго і трэба сказаць аператару падчас замовы “Таксі дабрыні”, ці, калі вы апынуліся ў горадзе і бачыце сінюю (а сіні колер прызнаны міжнародным колерам аўтызму) таксоўку з сімволікай акцыі, проста пакажыце кіроўцу на смартфоне адпаведную сімволіку”.

Апроч таго, перад паказам спектакля, у 18.30, там жа, у Палацы ветэранаў, будзе прэзентаваны дакументальны фільм Сяргея Ісакава “Хто апошні…” — чатыры гісторыі асаблівых гадаванцаў тэатра “і”.

“Калі мы пачалі з тэатрам ездзіць, выступаць, — кажа прадзюсар тэатра Леанід Дзінэрштэйн, — мы заўважылі, як грамадства паступова змяняе стаўленне да праблемы аўтызму. Мы даем людзям своеасаблівую “прышчэпку разнастайнасці грамадства”. І плануем і надалей ствараць новыя спектаклі”.

Мікалай Левертаў