Выдатная навіна для ўсіх, каму бракуе беларускамоўнага кантэнту. Новы карысны і пазнавальны ютуб-канал пра хімію па-беларуску пад назвай «Янахімічыла» абяцае дадаць і карысных ведаў, і добрага настрою.

У першым выпуску можна знайсці інфармацыю пра тое, як палепшыць смак кавы і што з навуковага пункту гледжання ўплывае на смак улюбёнага напою.

На канале пакуль толькі адно відэа, але каментары ад гледачоў вельмі пазітыўныя. Да прыкладу, пішуць:

«Толькі не спыняйцеся, вельмі прыемна чуць родную мову»;

«Ваў, сяджу, пʼю свой тры ў адным і проста тану ў падрабязнасцях. Дужа займальна распавяла, чакаю працягу».

«У нас такіх хімічак не было ў школе) Яна, добры якасны кантэнт. Цяпер дзецям будзе прасцей разумець хімію з гэтым каналам».

Насамрэч, канал будзе цікавы і карысны не толькі дзецям, але і дарослым.

Нагадаем таксама пра адукацыйны праект «Разумняты» ад грамадскай кампаніі «Будзьма беларусамі». Гэта  інтэрактыўныя пазнавальныя відэаўрокі, якія ў займальнай форме знаёмяць дзетак з навакольным светам на роднай мове.

Трэці сезон “Разумнятаў” створаны ў адпаведнасці са школьнай праграмай па прадмету “Чалавек і свет: мая Радзіма – Беларусь” для 4 класа. Цяпер атрымліваць веды ў школе  не толькі карысна, але і цікава. Глядзіце па спасылцы.