«Сёння ў Маскве стартуе кінафестываль Artdocfest. Удзел у ім — адно з маіх даўніх жаданняў і мэтаў. Мой фільм (зняты ў Беларусі, вытворчасць Германіі) быў запрошаны ў пазаконкурсную праграму сёлетняга фестывалю, чаму я была вельмі радая. З прычыны вайны, развязанай уладамі Расіі супраць Украіны, мы — я і мой кінааператар і супрадзюсар — прынялі рашэнне не ехаць на фестываль Artdocfest у Расію і, акрамя таго, зняць наш фільм з праграмы паказаў у Маскве», — напісала Крысціна на сваёй старонцы ў Facebook.
Таксама Крысціна адзначыла мужнасць арганізатараў кінафестывалю, бо «фестываль Artdocfest публічна выступае ў падтрымку Украіны і супраць вайны», «але паказ фільма ва ўтульнай кіназале ў Маскве ў той час, калі расійскія бомбы падаюць ва Украіну, а яе жыхары вымушаны шукаць прытулак, быў бы непрымальнай для нас нармалізацыяй стану вайны».
Пра які менавіта фільм ідзе гаворка, рэжысёрка не ўдакладняе. Магчыма, гэта дакументальная стужка Khan’s Flesh («Плоць хана»), якая сёлета была адзначана ўзнагародамі Брусэльскага кінафестывалю.
