Храм у гонар святога благавернага князя Аляксандра Неўскага пабудуюць у Гродне. Праваслаўны храм са званіцай і парафіяльным домам з’явіцца на Вішняўцы, у раёне перасячэння Індурскай шашы з вуліцай Малахавіцкай. Характэрна, што пры праектаванні пабудовы за прататып была ўзятая Каложская царква, паведамляе «Вечерний Гродно».
Дамінантай царкоўнага комплексу стане аднакупальны храм вышынёй амаль у 20 метраў. Паведамляецца, што храм спраектаваны ў стылістыцы самабытнай гродзенскай школы старажытнарускага дойлідства з арыентацыяй на візантыйскую і раманскую архітэктуру. Пры гэтым адным з прататыпаў праекта стала Каложская царква.
— Храм будзе цагляным. Яго сцены аздобяць плінфай — тонкай абпаленай цэглай, з якой працавалі будаўнікі Антычнага свету, Візантыі і Старажытнай Русі і клінкернай пліткай, стылізаванай пад плінфу. Фасады будуць дэкараваныя характэрнымі для Каложскай царквы ўстаўкамі з паліраваных каляровых валуноў і паліраванай керамічнай пліткі (маёлікі) з арнаментам з крыжоў, — паведамляецца ў дакументацыі.
Акрамя таго, комплекс дапоўняць чатырох’ярусная званіца і трохпавярховы парафіяльны дом. Там будзе створаны Цэнтр духоўна-маральнай асветы моладзі, а таксама музей першага Патрыяршага Экзарха ўсяе Беларусі Мітрапаліта Філарэта (Вахрамеева).
Адзначым, што раней у Гродне існавала Аляксандра-Неўская царква. Храм размяшчаўся на цяперашняй плошчы Тызенгаўза і быў разабраны ў 1938 годзе.
Праект будучага храма выставяць на грамадскія абмеркаванні.
Грамадскія абмеркавання працягнуцца з 24 траўня па 17 чэрвеня ўключна. Заўвагі і прапановы могуць пакінуць усе жадаючыя. Зрабіць гэта можна як у пісьмовай, так і ў электроннай форме з пазнакай «грамадскія абмеркаванні».
Вось адрасы:
— Гродзенскі гарадскі выканаўчы камітэт, Плошча Леніна, 2/1, 230023, г.Гродна. Электронная пошта: [email protected];
— Упраўленне будаўніцтва, архітэктуры і горадабудаўніцтва Гродзенскага гарвыканкама, паштовы адрас: пл. Антонія Тызенгаўза, 3, 230023, г.Гродна. Электронная пошта: [email protected];
— Ці выкарыстоўваючы сэрвіс «Электронныя звароты» на афіцыйным сайце Гродзенскага гарадскога выканаўчага камітэта.
