Уладзіслава Плюшчава, бас-гітарыста гуртоў Hasta La Fillsta, Zet, Pomidor/OFF, «Крамбамбуля» асудзілі на два гады калоніі агульнага рэжыму адразу па трох артыкулах КК Беларусі: 188 (публічная абраза гонару і годнасці); 369 (публічная абраза прадстаўніка ўлады); 179, ч.1 (незаконны збор інфармацыі аб прыватным жыцці).
Апроч гэтага, музыка мусіць сплаціць штраф на суму каля 2500 еўра ў эквіваленце. Таксама для пакрыцця штрафу ў яго канфіскавалі аўто.
Улада затрымалі 12 красавіка, пад прымусам запісалі «пакаяльнае» відэа і асудзілі на 25 сутак — за тое, што хадзіў на маршы ў 2020-м і быў падпісаны на «экстрэмісцкія» каналы. Па сканчэнні сутак прад’явілі абвінавачванні па крымінальнай справе, амаль тры месяцы музыка правёў у турме ў чаканні суда.
І вось цяпер вядомы вырак — два гады калоніі. Што стала прычынай? Збіраў і перадаваў звесткі пра прадстаўнікоў «уладаў» Пружанаў мясцоваму тэлеграм-каналу, пакідаў пра іх каментары з рытарычным пытаннем «Як вам спіцца?» У матэрыялах справы пералічаныя імёны прыкладна дзясятка такіх «пацярпелых». Гэта кіраўніцтва Пружанскага раёна, мясцовыя службоўцы, супрацоўнікі райвыканкама, якія ў 2020-м перавышалі паўнамоцтвы, удзельнічалі ў сілавых разгонах мітынгаў, якія маюць дачыненне да рэпрэсій наступных гадоў. То і праўда, як ім сёння спіцца?
Давайце падтрымаем Уладзіслава і яго блізкіх.