Гурт «Петля пристрастия» у сваім пабліку паведамляе, што яны зноў вымушаны перанесці канцэрт. Ліст пра тое, што па тэхнічных прычынах канцэртная зала Prime Hall не зможа прыняць заўтрашні выступ, група атрымала некалькі гадзінаў таму.
Адмена звязана з «інцыдэнтам», які адбыўся на канцэрце «Пошлой Молли», калі слухачы скандавалі «Жыве Беларусь!». На мінулым тыдні ў сувязі з гэтым выпадкам гурту прапанавалі «прыняць дадатковыя захады па забеспячэнню грамадскай бяспекі і выкананню закона Рэспублікі Беларусь пра масавыя мерапрыемствы». Як пішуць музыкі, «мяркуючы па атрыманым сёння лісце, прынятыя намі меры аказаліся недастаткова пераканаўчымі».
Гурт выбачаецца перад слухачамі і паведамляе, што актыўна шукае іншую пляцоўку і дату для выступу.
Гэта ўжо другі раз за апошні час, калі пераносіцца канцэрт «Пятлі». У красавіку канцэрт адмяніўся з нагоды «абмежаванняў на правядзенне масавых мерапрыемстваў, звязаных з эпідэміялагічнай сітуацыяй».
Вакаліст калектыву Ілля Чарапко-Самахвалаў увосень прайшоў праз «суткі».Ён атрымаў 15 сутак зняволення за ўдзел у нядзельным маршы.
Budzma.by