У Беларусі запушчаны першы у гісторыі праект, які распавядае аб адным традыцыйным промысле, яго развіцці і таемных старонках. І гэтым промыслам з’яўляецца бортніцтва – традыцыйная форма лесакарыстання, а таксама комплекс практычных ведаў і нематэрыяльнай спадчыны беларусаў. Сёння падзівіцца на бортніцтва можна ў сеціве – www.bortnictva.by
“Зараз распачаты першы этап рэалізацыі задумы – стварэнне інфармацыйнага асяроддзя бортнай традыцыі, стварэнне бортнага партала, які ўвабраў даследніцкія, аналітычныя, факталагічныя дадзеныя мінулых гадоў (аўтараў мінулых стагоддзяў і сучаснасці). Па сутнасць, такі грунтоўны партал, прысвечаны толькі аднаму промыслу, – першы ва Ўсходняй Еўропе (аднак, ёсць нешта падобнае ў Польшчы). Пры гэтым некаторыя яго часткі (напр. бортная інфаграфіка) з’яўляецца ўнікальнымі як для Беларусі, так і для суседніх краін”, – распавядае Іван Восіпаў, аўтар праекта.
Партал прысвечаны тутэйшым спадчынным бортнікам, а таксама тым, хто сёння вывучае, практыкуе гэты промысел, зрабіў унёсак у захаванне бортнай традыцыі. Ён складаецца з большасці аспектаў бортнага промысла і традыцыі: акрамя гістарычных фактаў, таксама пададзены практычныя веды пра промысел у сучасным стане,
Раскрыццё тэмы бортніцтва ў Беларусі паказваецца адразу з усіх бакоў: гісторыя развіцця, матэрыяльная культура, духоўная культура. І атрымліваецца, што з аднаго боку – гэта абагульненне ў спрошчанай форме амаль усіх сведчанняў і дадзеных пра традыцыйнае бортніцтва, з другога – гэта графічнае і фатаграфічные ажыўленне (стварэнне віртульнага бортнага асяродзя), пры гэтым некаторыя графічныя элементы з’яўляюцца ўнікальнымі ня толькі ў Беларусі, але і ў суседніх краінах (як самых блізкіх, так і не зусім).
“Галоўная мэта праекта – асветніцкая дзейнасць, адукацыйна-інфармацыйны праект, які распавядае пра адзін з промыслаў, які і сёння бытуе ў Беларусі. Бортны промысел – гэта не прымітыўнае пчалярства, гэта цэлая лакальная культура ў супрацьвагу глабалізыцыі. Ён, канешне, звязаны, як пчалярства з пчоламі і прадуктамі іх вытворчасці, аднак, больш цесна стасуецца з грамадскімі звычаямі, прыродным асяроддзем і адмысловай роллю пчалы і самаго промысла ў сістэме каштоўнасцей. Калі казаць простымі словамі, то бортны промысел – гэта старажытная субкультура са сваімі асаблівасцямі і светаўспрыманнем”, – кажа Іван.
“Ідэя праекта нарадзілася гадоў 7 назад, калі я актыўна пачаў вывучаць (чытаць і шукаць этнаграфічныя звесткі) пра бортніцтва ў Беларусі. Пасля некаторага часу з’явілася думка пра стварэнне віртуальнай прасторы бортніцтва”, – працягвае ён.
“Партал цалкам зробены ўласнымі рукамі, за ўласныя сродкі. І гэтая праца яшчэ не скончаная, бо застаецца вялікі масіў нераскрытых да канца тэм, асаблівасцей і цікавых з’яў. Праца працягваецца і зараз і галоўным вынікам стане стварэнне ілюстратыўнай віртуальнай “кнігі” па аўтэнтычнаму промыслу. А наперадзе – пераклад тэкстаў на замежныя мовы (пасля тэрміналагічных удакладненняў), стварэнне новых раздзелаў, падрыхтоўка новых проектах інфаграфікі і шмат іншага”, – падсумоўвае Іван.
Зараз партал дасяжны на беларускай мове на кампутарах, смартфонах і планшэтах. Ён створаны дзеля інфармацыйных і адукацыйных мэт і прызначаны для ўсіх катэгорый зацікаўленых: шкаляроў, студэнтаў, моладзі, людзей сталага ўзросту і ўсіх тых, хто зацікаўлены аўтэнтычнымі традыцыямі, культурай Беларусі і цікавымі промысламі роднай зямлі.
Паводле прэс-рэліза
