Пачаў працавай сайт-навігатар па аўдыякнігах на беларускай мове і беларускіх аўтараў audiobooks.by. Сайт не змяшчае самі кнігі, а дае спасылкі на пляцоўкі, дзе іх можна паслухаць альбо набыць.
Тут можна хутка знайсці аўдыякнігі сучасных аўтараў, а таксама класічныя і дзіцячыя творы ў аўдыяфармаце. На дадзены момант на сайце больш за 340 твораў з такіх крыніц, як Кніжны Воз, Беларуская палічка, Камунікат, Радыё Св**да, Беларускі ПЭН-цэнтр, Мінінфарм РБ і іншых.
Ставаральнікі навігатара пішуць, што ідэя зрабіць сайт прыйшла не адразу, спачатку быў створаны тэлеграм-канал:
«Пачалі мы з запісу аўдыякніг сучасных беларускіх аўтараў. Але ж кнігу запісаць — запісалі, а дзе пра яе напісаць, каб беларусы даведаліся? Дзеля гэтага пачалі гэты канал, каб посціць навіны пра нашыя кнігі і іншыя аўдыякніжнія рэлізы. Выявілася яшчэ адна праблема: калі навіны ёсць дзе посціць, няма месца, дзе можна паглядзець, „што ўжо запісана“. Скроліць пасты не вельмі зручна. Таму і вырашылі стваріць адмысловы сайт. І — каб зрабіць яго больш карысным — сабраць ужо запісаныя кнігі ў беларускім інтэрнэце ў адзін каталог. Выявілася, што іх запісана ўжо шмат, асабліва класікі! Але яны раскіданыя па розных кутках інтэрнэту і арыентавацца ў іх складана. Таму мы і сабралі ўсё, што змаглі знайсці, у адным месцы. Напрыклад, можна паглядзець усе кнігі, агучаныя купалаўкай Крысцінай Дробыш, ці запісаныя кнігі Уладзіміра Караткевіча, а таксама даведацца, што рэкардсмен па агучках — „Людзі на балоце“ з 3 рознымі варыянтамі на 9 пляцоўках».
