Грамадская культурніцкая кампанія “Будзьма беларусамі!” і грамадскае аб’яднанне “Саюз беларускіх пісьменнікаў” ужо не першы год ладзіць творчыя сустрэчы з неардынарнымі, таленавітымі асобамі.
Халоднымі лістападаўскімі днямі такія творчыя сустрэчы былі па-асабліваму цёплымі і ўтульнымі.
22 лістапада ў мінскай сярэдняй школе № 170 адбылася інтэрактыўная гульня-спектакль. Да вучняў пачатковай школы прыйшоў актор, рэжысёр, пісьменнік Васіль Дранько-Майсюк. Гучалі вершы Якуба Коласа і проза Янкі Маўра, неверагодныя гісторыі ствараліся тут жа самімі школьнікамі. Цікавая сустрэча і нечаканыя заданні-пытанні ад госця аб’ядналі вучняў розных класаў – адказвалі і дзейнічалі яны як адна каманда.
23 лістапада ў школе №3 г. Бяроза адбылася творчая сустрэча з пісьменніцай Валянцінай Осіпавай і мастаком Сяргеем Казаком. Марыя Стэфанава, настаўніца беларускай мовы і літаратуры, якая дарэчы з юнацтва захапляецца паэзіяй і сама таксама піша вершы, часта запрашае да сябе ў школу паэтаў і пісьменнікаў.
На гэты раз настаўніца вырашыла пазнаёміць вучняў 9-га класа з паэтычнымі і жывапіснымі творамі землякоў. Валянціна Осіпава не першы раз выступае перад школьнікамі, яны заўсёды з вялікай цікавасцю ўспрыймаюць яе вершы. На гэты раз паэтка зачытала не толькі свае творы, але і нагадала аўдыторыі пра жыццёвы і творчы шлях вядомага берасцейскага паэта Алеся Каско, які год таму пайшоў ў лепшы свет. У памяць аб безкампрамісным паэце Валянціна Осіпава зачытала нізку яго вершаў, якія слухачы ўспрынялі з вялікай увагай. Спадарыня Валянціна традыцыйна правяла сярод вучняў гістарычную віктарыну і расказала пра дзейнасць Саюза беларускіх пісьменнікаў і грамадскую культурніцкую кампанію “Будзьма беларусамі!”.
А вось Сяргей Казак, які сам родам з вёскі Равяцічы Бярозаўскага раёна, упершыню знаёміў школьнікаў са сваёй творчасцю.
Творчая сустрэча прайшла ў цёплай эмацыйнай атмасферы. Дзеці дыскутавалі, задавалі цікавыя пытанні, дзяліліся думкамі і ўражаннямі. Многія з іх за актыўны ўдзел у размове былі ўзнагароджаны сувенірамі і памятнымі паштоўкамі “Не маўчы па-беларуску”, а школьная бібліятэка, дзякуючы кампаніі “Будзьма беларусамі!”, папоўнілася новымі экзэмплярамі сучасных беларускіх часопісаў.
Гэтым жа днём, 23 лістапада ў бібліятэцы № 2 Мінска адбылася сустрэча з музыкам Ярашам Малішэўскім і пісьменніцай Аксанай Спрынчан, прысвечаная Году малой радзімы. Паслухаць творчую сям’ю бібліятэкары запрасілі васьмікласнікаў. Яны былі такія ўважлівыя, цікаўныя і файныя, што спадарыня Аксана лунала не толькі ўзгадваючы свой родны Лунінец, але і ўзгадваючы свой восьмы клас у мінскай школе.
Спадар Яраш сваёй музыкай і спевамі натхняў на такія гучныя воплескі, што было цяжка паверыць, што на іх здольныя вучні аднаго класа. Безліч пытанняў з аднаго і другога боку, стылёвыя прызы ад ГКК “Будзьма беларусамі!” і цудоўны настрой у Год малой радзімы (хоць малой Радзімы не бывае) быў забяспечаны.
А 24 лістапада музыка Таццяна Матафонава-Грыневіч і паэт Міхась Скобла выступілі ў мінскай сярэдняй школе № 60. Пазнаёміўшы вучняў са сваімі вершамі, паэт звярнуў увагу, што проста пад вокнамі школы ўсталяваны помнік літары “Ў” і прапанаваў назваць самыя запамінальныя помнікі гістарычным асобам ці падзеям, што адбыліся ў Беларусі. Вучнёўскія адказы пасыпаліся як гарох з мяшка: помнікі Янку Купалу і Якубу Коласу, помнік Вандроўнаму Колу ў Траецкім прадмесці і помнік Пачатку ўсіх дарог на Кастрычніцкай плошчы, помнік зубру каля дарогі М1 і помнік буслам на Плошчы Незалежнасці… “А ведаеце, які помнік можна назваць самым арыгінальным? – працягваў весці рэй М. Скобла. – Той помнік я пабачыў у Полацку летась, калі адзначалася 500-годдзе беларускага кнігадрукавання. На помніку ў вялікім металічным лісце выразана слова СКАРЫНА, і сонца, праходзячы праз літары-адтуліны, выпісвае прозвішча беларускага асветніка промнямі на сцяне! І месца для таго помніка выбрана невыпадкова – гэта сядзіба пісьменніка Алеся Аркуша, а гадоў 400 таму там знаходзіўся бернардынскі кляштар, дзе юны Францішак хадзіў у школу”…
Спадарыня Таццяна парадавала ўсіх песнямі на вершы класікаў айчыннай літаратуры, завяршыўшы свой выступ “Курай-шчабятурай”, якую падпявалі ўсёй залай.
У нядзелю, 25 лістапада адбылося адразу 2 імпрэзы.
У этнакраме “Цудоўня” ў Гародні прайшла ўжо трэцяя па ліку “Адкрытая дыскусія”. Гэтам разам тэмай дыскусіі, мадэратарам якой з’яўляецца Мікалай Плавінскі, стала абмеркаванне ролі паўстання 1863–1864 гадоў у гісторыі Беларусі.
Ахапіць гэтыя меркаванні і даць ім прафесійную ацэнку і паспрабавалі гісторык-архівіст, кандыдат гістарычных навук Зміцер Матвейчык і даследчык жыцця і дзейнасці Кастуся Каліноўскага Васіль Герасімчык.
У працэсе больш як дзвюхгадзіннай гутаркі і гісторыкі і наведвальнікі “Адкрытай дыскусіі” абмеркавалі шматлікія пытанні, звязаныя з прычынамі паўстання, яго ходам і наступствамі. Шмат увагі было нададзена ролі ў паўстанні Кастуся Каліноўскага і яго вобразу ў гістарычнай свядомасці Беларусі.
А ў Бараўлдянах тым часам у цэнтры сямейнага вольнага часу адбылася музычна-паэтычная прэзентацыя ўнікальнай кнігі “Бліскавіцы: анталогія жаночай паэзіі міжваеннага перыяду” з удзелам укладальнікаў кнігі і музычнага гурта “Балцкі Субстрат”. Пра гэту падзею можна пачытаць тут.
P.S. Калі Вы жадаеце зладзіць цікавую сустрэчу з ГКК “Будзьма беларусамі!” і ГА “Саюз беларускіх пісьменнікаў” у сваёй мясцовасці, пішыце на скрыню: [email protected] – будзем рады новым сябрам!
