Піт Паўлаў — вядомы беларускі музыка, кампазітар і выканаўца, удзельнік рок-гуртоў «Мроя», NRM, заснавальнік праектаў Garadzkija і Pete-Paff, адмыслова для budzma.org падзяліўся ўласным топам улюбёных беларускіх песень.
Фота: 34mag
1. N.R.M. — Лёгкія- Лёгкія
2. Narodny Albom — Простыя Словы
3. Кася Камоцкая — Мая Краіна
4. Ляпис Трубецкой — Грай
5. N.R.M. — Мроя Мая
7 лістапада Піт Паўлаў адсвяткаваў свой 56 дзень народзінаў і прэзентаваў кліп на песню «Рэха» з альбому «Zbroja. Zołata. Kabiety.».
«Кліп складзены з вандровак па Беларусі, — піша музыка на сваёй старонцы ў Фэйсбуку — Перагледзеў і быццам бы пабываў дома».
Сёння Піт Паўлаў жыве ў Варшаве.
Нагадаем, што 14 лістапада адбылася прэм’ера на стрымінгах альбома Піта Паўлава «Zbroja. Zołata. Kabiety.». Увогуле гэты альбом быў запісаны яшчэ ў 2017 годзе, але магчымасць паслухаць яго на стрымінгавых платформах з’явілася толькі зараз.
Сольны альбом музыкі складаецца з 13 трэкаў, якія прысвечаны прыгодніцкім гісторыям з аўтабіяграфічных твораў Сяргея Пясецкага. Менавіта раманы Пясецкага натхнілі Піта Паўлава на напісанне тэкстаў для сваёй сольнай працы:
— У раманах Пясецкага вельмі цікавая атмасфера горада, якога мы зусім не ведаем: з бандамі, нападамі, рабаваннямі, паліцмайстарамі, гатэлем «Еўропа», яўрэйскай карчмой на Лагойскім тракце.
Для многіх гісторыя Менска пачынаецца пасля Вялікай Айчыннай, а якім быў і як выглядаў горад да гэтага, няма ніякага ўяўлення, — тлумачыў Піт Паўлаў у інтэрв’ю 34mag.net, чым яму адгукнуліся атмасфера і лірычны герой раманаў Пясецкага. — Вядома, я сябе крыху асацыюю са сваім героем: у мяне таксама былі развілкі, калі я мог стаць крымінальным падлеткам альбо пакінуць музыку і стаць бізнэсмэнам. І, як у яго, у мяне гэтая развілка паміж савецкай культурай, дзіцем якой я непасрэдна з’яўляюся, беларускай нованароджанай, у якой я ўдзельнічаў і ў якую ўнёс некаторы ўклад, і польскай. Натуральна, ніякай зброі ў мяне ў кішэні няма, золата аказіянальнае і з кабетамі ўсё крыху больш прыстойна.
Фота: Вокладка альбома «Zbroja. Zołata. Kabiety.»