Малады беларускі гурт «Nochy», а дакладней, ягоная лідарка Юлія Петраш адмыслова для budzma.org падзялілася ўласным топам улюбёных беларускіх песень.
Фота: instagram гурта «Nochy»
1. Песняры — «Зачараваная»
У гэтай песні вабіць лёгкая і мройная атмасфера, у якой прысутнічае зліццё беларускай лірыкі і прыгожай мелодыі. Песня ахінае рамантыкай. «Песняры» ўвогуле апярэдзілі свой час у музыцы.
2. NRM — «Легкія-лёгкія»
Тэкст пра рэчаіснасць тады і цяпер, а мелодыя падкрэслівае яго эмацыйнасць. Такая балючая прыгажосць. Песня якую хочацца ставіць на repeat.
3. Іва Sativa — «Коса»
Іва — тая спявачка, што выводзіць сваім сучасным гучаннем беларушчыну за межы звыклага. Яна прываблівае сваёй адкрытасцю і як асоба ў жыцці па-за сцэнай.
4. Kriwi — «I Will Comeback Home»
«...правяду русалачку да бору».. Беларускія народныя спевы мне блізкія, я навучалася ў Мінскім музычным каледжы імя Глінкі на народным аддзяленні і адчуваю прыемную настальгію па тых часох. А Kriwi я мела магчымасць слухаць ужывую. Електронная музыка разам з беларускімі спевамі — гэта шыкоўна, яшчэ і калі раскладзена на тры галасы, у дзяўчат з гурта яны прыгожа пераліваюцца і вельмі гарманічна гучаць разам.
5. The Superbullz — «Hardcore zachodniaha palieśsia»
Драйв і моц. Вельмі дужы вакал, энэргія вялікіх стадыёнаў. Мне насамрэч і іншыя трэкі падабаюцца. У гэтым проста ё хук добры для прыпеву і слова «Палессе»:). Мне даспадобы творчасць RATM, Metallica і т.п і ў The Superbullz такі ж самы feel — гучаць жыццёва. З выразнай пазіцыяй.
