У апошнія дні восені грамадская культурніцкая кампанія “Будзьма беларусамі!” ды грамадскае аб’яднанне “Саюз беларускіх пісьменнікаў” зладзілі колькі непаўторных сустрэч з творчымі асобамі.
27 і 29 лістапада на Брэстчыне адбыліся сустрэчы з паэтэсай Верай Буланда. Спадарыня Вера завітала ў Белаазёрскую гімназію і Бярозаўскую сярэднюю школу. Тут паэтэса падзялілася сваімі цёплымі ўспамінамі пра чароўную пару – дзяцінства:
“Як прыемна прыгадаць родныя мясціны – в. Мсціж, што на Барысаўшчыне, якой прысвечанашмат вершаў:
Прыехаць бы на Мсціж свой леташні,
Калі былі мы значна лепшымі,
Каб па лугах прайсціся босымі,
Умыцца б травамі нам роснымі,
Ды сонцам ранішнім уцерціся,
Ды на вясёлку абаперціся…
… Самым любімым захапленнем у дзяцінстве, як і пасля, у юнацтве, было чытанне кніг. Любімымі ў сям’і былі кнігі Янкі Маўра. І зараз родны брат, які жыве ў Маскве, просіць прывезці аповесці “У краіне райскай птушкі”, “Чалавек ідзе”, “Палескія рабінзоны” – перачытвае ці не ў дзясяты ўжо раз.”
І калі адна з вучаніц задала пытанне спадарыні Веры наконт сустрэч і знаёмстваў з вядомымі пісьменнікамі, паэтэса пахвалілася, што ў Барысаўскім раёне ў в. Бытча пэўны час настаўнічаў Іван Міхайлавіч Фёдараў, ён жа Янка Маўр. У 1925 годзе ў часопісе “Беларускі піянер” ён надрукаваў першую навукова-фантастычную аповесць на беларускай мове “Чалавек ідзе”, якая паклала пачатак фантастычнаму і прыгодніцкаму жанрам у беларускай літаратуры. А ў самім Мсціжы жыў Пімен Панчанка, калі быў яшчэ школьнікам. З 1988 года перапісваўся з Верай Аляксандраўнай і дасылаў ёй свае новыя кнігі з зычлівымі аўтографамі.
Для вучняў, якія пішуць вершы, спадарыня Вера правяла майстар-клас. А Самыя актыўныя ўдзельнікі гутаркі атрымалі ад кампаніі “Будзьма беларусамі!” падарункі.
29 лістапада бібліятэцы №10 пры падтрымцы грамадскай культурніцкай кампаніі “Будзьма беларусамі!” адбылася прэзентацыя рамана Яўгена Зубовіча “Беларускі палкоўнік”. Раман, прысьвечаны драматычным падзеям 17 стагоддзя.
Калі на словах “прэзентацыя кнігі” вы ўявілі проста расказ аўтара пра свой твор, то тут было зусім не так! Падчас прэзентацыі “Беларускага палкоўніка” гучалі дуды і барабаны, па зале хадзілі ўзрушаныя героі кнігі, і проста на вачах гледачоў адбываліся сапраўдныя рыцарскія баёўкі! Ды што там, гледачы самі маглі паўдзельнічаць у прэзентацыі ды яшчэ атрымаць прызы ад аўтара ды камапніі “Будзьма беларусамі!”.
Гэтам жа днём у “Кніжнай шафе” адбылася творчая сустрэча літаратараў. Ад кампаніі “Будзьма беларусамі!” ды “Саюза беларускіх пісьменнікаў” на вечарыне выступала Віка Трэнас. Вельмі душэўная атрымалася сустрэча. Сапраўдныя аматары прыгожага слова насалоджваліся вершамі, абмяркоўвалі сучасную літаратуру ды рабілі сэлфі з выступоўцамі (фота Насты Анцімонік)
P.S. Калі Вы жадаеце зладзіць цікавую сустрэчу з ГКК “Будзьма беларусамі!” і ГА “Саюз беларускіх пісьменнікаў” у сваёй мясцовасці, пішыце на скрыню: stasyaky88@gmail.com – будзем рады новым сябрам!
