З 4 чэрвеня ў некалькіх буйных цэнтрах беларускай эміграцыі праходзіць фестываль інтэлектуальнай кнігі PRADMOVA. Імпрэзы ўжо адбыліся ў Тбілісі і Кракаве, на гэтых выходных на чарзе Варшава, скончыцца фестываль 26 чэрвеня ў Вільнюсе. Для варшаўскіх наведвальнікаў PRADMOVA арганізатары падрыхтавалі вельмі насычаную праграму. Гасцей фестывалю чакаюць філасофскія размовы, прэзентацыі кніг, спектаклі і чыткі п’ес, літаратурная прэмія і нават вялікі гала-канцэрт беларускіх гуртоў і музыкаў.
18 і 19 чэрвеня ў Беларускім Моладзевым Хабе (plac Konstytucji 6) у Варшаве пройдзе фестываль PRADMOVA. Каб усё паспець і нічога не прапусціць, наведвальнікам варшаўскіх імпрэз трэба будзе пастарацца, бо арганізатары падрыхтавалі вельмі насычаную і поўную цікавостак праграму. У ёй вы знойдзеце шмат дыскусій на актуальныя сёння тэмы з выбітнымі інтэлектуаламі з Беларусі і Польшчы, сярод якіх Святлана Алексіевіч, Уладзімір Арлоў, Таццяна Заміроўская, Адам Міхнік, Славамір Серакоўскі, Саша Філіпенка. Яшчэ адна асаблівасць праграмы ў Варшаве — вялікая колькасць перфарматыўных і тэатральных імпрэз. Вас запрашаюць на спектаклі, чыткі п’ес і перформансы. Таксама на фестывалі наведвальнікаў чакаюць прэзентацыі кніг і перакладаў, майстар-класы і літаратурная прэмія. На працягу ўсёй PRADMOVA у Варшаве будзе працаваць кніжны кірмаш, дзе можна будзе набыць кнігі беларускіх і польскіх выдавецтваў. Выдатным фестывальным дням — не менш выдатнае заканчэнне. Першы дзень варшаўскай PRADMOVA завершыць паэтычны марафон — Ноч паэзіі. Свае і чужыя творы прачытаюць Уладзімір Лобач, Марыя Мартысевіч, Таццяна Нядбай, Дзмітрый Строцаў, Анхела Эспіноса, а вядоўцам выступіць Андрэй Хадановіч. Другі фестывальны дзень скончыцца вялікім гала-канцэртам беларускіх гуртоў і музыкаў: Nizkiz, Tyapin Crew, Dzieciuki, Юры Стыльскі («Дай дарогу!»), Botanic Project, Аляксандр Памідораў, Дзяніс Тарасенка («Разбітае сэрца пацана»), Rahis. Сярод удзельнікаў і ўдзельніц PRADMOVA у Варшаве: Паліна Дабравольская, Яўгенія Давыдзенка, Павел Касцюкевіч, Марэк Радзівон, Наталля Станкевіч, Сцяпан Стурэйка, сямейны ансамбль «Бартосікі» і шмат іншых яскравых аўтараў і калектываў.
Уваход на ўсе мерапрыемствы PRADMOVA вольны. Падрабязная праграма на старонках фестывалю ў Instagram і Facebook, а таксама па спасылцы.