Напярэдадні чарговай сустрэчы ў межах творчай анлайн-прасторы PartyZonа, якая адбудзецца заўтра, на пытанні нашай анкеты адказвае інструктар па гістарычным фехтаванні Юрый Усціновіч.
1. Хто Вы па жыцці?
Прафесійны разгельдзяй.
2. Кім марылі быць у дзяцінстве?
Касманаўтам, лётчыкам, вайскоўцам, героем...
3. Калі б была магчымасць карэнным чынам змяніць жыццё, ці скарысталіся б і як?
Вядома ж скарыстаўся б! Адправіўся б у космас, каб там разводзіць цмокаў; спусціўся б на дно акіяну і там пабудаваў бы сабе лецішча; пасябраваў бы з дэльфінамі; адправіўся б у мінулае, каб выратаваць Александрыйскую бібліятэку ці спыніць мангола-татарскае нашэсце на Русь; выпраўляўся б у падарожжы не радзей за адзін раз на месяц; вярнуў бы Беларусь сапраўдным беларусам і г. д.
4. Ваша жыццё — гэта Ваша прафесія, ці ёсць яшчэ інтарэсы?
Маё жыццё — гэта часта не так, як ва ўсіх. Маё жыццё — гэта здзяйсненне памылак і спробы іх выправіць..
5. Як пачынаецца Ваш ранак?
А 5.30 падымаюся, каб адключыць будзільнік жонкі. Бужу жонку, якая падняўшыся 20-30 хвіль рэлаксуе, застуючыся адна сама з сабою. Сам ізноў кладуся. Жонка будзіць каля 6.50 за некалькі хвіль да пабудкі дзяцей. Зборы ў школу. Гарбата. Адвожу дзяцей у школу. Па вяртанні, дзесьці з 8.40 маю хвіль 20-30 на няспешны сняданак з кавай.
6. Што/хто Вас натхняе?
Дзеці, жонка, сябры, неабходнасць пракарміць сям’ю.
7. Як вы адпачываеце?
Класічнага адпачынка не маю. Адпачываю праз здзяйсненне разснастайнай працы. Раней любіў чытаць мастацкую літаратуру, цяпер часу на чытво практычна няма. Урыўкамі сачу за навінамі, калі надараецца на некаторы час завіснуць ў адным месцы і не мець пільнай патрэбы выканаць якуюсь працу.
8. Назавіце найбольш значныя для вас кнігі, фільмы, музыку.
Буквар, кніга з адной казкай «Удовін сын» — першая самастойна прачытаная кніжка, «Ладдзя роспачы» Уладзіміра Караткевіча, творы Э. М. Рэмарка. Фільмы — «Куды прыводзяць мары», «9-я міля», «Храбрае сэрца» і інш. Музыка розныя накірункі рока, блюз, джаз.
9. Як паўплывалі на Вас падзеі 9 жніўня 2020 г. ?
Вярнулі веру і натхнілі.
10. Беларусь Вашай мары — гэта краіна, якая ў першыя два дзесяцігоддзі сваёй сапраўднай, а не такой як зараз, незалежнасці захоўвае дзяржаўны сувернітэт не ўваходзячы не ў Еўрапейскі Саюз, не ў СНД і таму падобныя саюзы. Пасля Беларусь можа стаць раўнапраўным чальцом Балта-Чарнаморскага саюза дзяржаваў.
Творчая сустрэча з Юрыем Усціновічам адбудзецца 27 траўня ў 19.30. Далучайцеся!
