Напярэдадні чарговых анлайн-чытанняў для дзетак, якія адбудуцца заўтра а 20-й гадзіне, на пытанні нашай анкеты адказвае акторка Валянціна Гарцуева.
Валянціна Гарцуева
1. Хто вы па жыцці?
Я ведаю, адкуль я, ведаю свае карані, вакол мяне цяпер толькі шчырыя людзі. Я займаюся любімай справай, гляджу прыгожыя фільмы і мару. Я свабодны чалавек, жанчына, жонка, дачка, летуценніца і вольны купалавец.
2. Кім марылі быць у дзяцінстве?
Заўсёды хацела быць акторкай. Хоць і прыкідвалася ў дзяцінстве, што не хачу. Я з тэатральнай сям’і, таму ўсім мой лёс заўсёды здаваўся вызначаным. Мяне гэта абражала. А цяпер думаю: як хораша, што спадзяванні добрых людзей спраўдзіліся.
3. Калі б была магчымасць карэнным чынам змяніць жыццё, ці скарысталіся б вы ёй і як?
Мне так цікава жыць сваё жыццё, што, думаю, нічога не мяняла б.
4. Ваша жыццё – гэта толькі ваша прафесія ці ёсць яшчэ інтарэсы, якія?
Гэта мая сям’я ў першую чаргу. І ўсё, што з ёй звязана.
5. Як пачынаецца ваш ранак?
Апошнім часам ранак мой вельмі ранішні! :) У 5-6 гадзін прачынаюся. Спачатку кава і навіны, якіх звычайна яшчэ няма)) Але я прызвычаілася менавіта так пачынаць дзень. Спадзяюся, гэта хутка пераменіцца.
6. Што/хто вас натхняе?
Гэта можа быць што заўгодна. Добры спектакль, прыгожая музыка, падзея, учынак чалавека, проста ветлівасць, мінакі, сабакі і каты, краявіды. Натхненне само мяне знаходзіць.
7. Як вы адпачываеце?
Спрабую нічога не рабіць. Літаральна. Гэта немагчыма, зразумела. Але гэтая спроба дапамагае назапасіць сілы.
8. Назавіце найбольш значныя для вас кнігі, фільмы, музыку
Люблю фільмы братоў Коэнаў, Макдонаха. З апошняга вельмі спадабаўся “Шчыгол” Донны Тарт. Заўсёды люблю чытаць Віктара Марціновіча, слухаю ўсё разам.
9. Як паўплывалі на вас падзеі жніўня 2020 года?
Маё жыццё перавярнулася дагары нагамі. Я больш не адчуваю сябе ў бяспецы, і цяпер мне быццам больш гадоў. Але ёсць і плюс: я перастала хлусіць сабе і сумнявацца, што знаходжуся там, дзе трэба.
10. Беларусь вашай мары – якая яна?
Вольная, прыгожая, незалежная краіна. Краіна, у якой людзі ганарацца сваімі дзецьмі, любяць бацькоў, паважаюць сябе і свае правы. Краіна, у якой можна любіць, вучыцца, працаваць, гадаваць дзяцей альбо нічога не рабіць і быць шчаслівым. Дзеці такой краіны ніколі не захочуць яе пакінуць.
Заўтра, 3 чэрвеня, Валянціна Гарцуева прачытае казку Ганны Янкуты «Кот Шпрот і зніклы мышамабіль».
Пачатак а 20-й гадзіне. Далучайцеся!
