Неагатычны будынак пачатку 20-га стагоддзя ацанілі ў 600 тысяч долараў (1 554 000 BYN). Аб’ява аб выстаўленні на продаж воданапорнай вежы па вуліцы Аўтадораўскай з’явілася на сайце «Куфар. Нерухомасць».
Будынак з чырвонай цэглы быў пабудаваны ў Мінску ў 1910 годзе. Цікава, што ўверсе можна пабачыць святлейшую цэглу — гэта вынік рэканструкцыі яшчэ даваенных часоў. Калі вежа яшчэ выконвала свае функцыі, яна забяспечвала вадой карпусы чыгуначнай бальніцы, паравознае дэпо, станцыю ды пасёлак чыгуначнікаў. Таўшчыня сцен вежы дасягае аднаго метра, раней у верхняй яе частцы знаходзіліся два металічныя бакі для вады, кожны з якіх змяшчаў 80 тон вады.
Да пачатку дзевяностых будынак належаў Белчыгунцы, а пасля перайшоў у прыватную маёмасць. З таго часу было некалькі спробаў рэканструкцыі, некалькі праектаў, каб даць будынку новае жыццё, але ўсё яны скончыліся безвынікова. На дадзены момант вежа знаходзіцца ў занядбаным стане, хоць і з’яўляецца гісторыка-культурнай каштоўнасцю.
Гэта адзіны захаваны будынак у Мінску падобнага кшталту. На жаль, ён дагэтуль не стаў кропкай прыцягнення турыстаў, як, напрыклад, гарадзенскія равесніцы вежы «Кася» і «Бася». Хочацца верыць, што пасля продажу будынак займее новае жыццё.
