Выпускнікі 2023 года не будуць здаваць ЦТ: што зменіцца?

Пра новыя правілы паступлення ў вну нагадалі на беларускім тэлебачанні. Так, выпускнікі 2023 года не будуць здаваць звыклае ЦТ. Замест яго — два цэнтралізаваныя экзамены. 


lecture-in-college-min-scaled.jpeg
Фота: univerpl.com.ua

Першы экзамен — руская ці беларуская мова на выбар. Другі — профільны ў залежнасці ад спецыяльнасці. Вынікі будуць залічаныя ў атэстат. Па яго сярэднім бале па-ранейшаму будуць выдаваць сертыфікаты. Адначасова вынікі экзаменаў будуць пераведзеныя ў 100-бальную сістэму замест ЦТ. Асобна ўводзіцца ўступнае выпрабаванне ў самой вну — першы профільны экзамен. Ён будзе праходзіць у два этапы.

«Беларусь 1» цытуе словы начальніка галоўнага ўпраўлення Міністэрства адукацыі Беларусі Сяргея Каспяровіча:

«Ва ўніверсітэты ў час ікс прыходзяць заданні з Рэспубліканскага інстытута кантролю ведаў. Заданні з базы ЦТ, але ўжо, скажам так, трэцяга-чацвёртага ўзроўню складанасці. Камісія ацэніць правільнасць. Але, уласна кажучы, тут важна разумець двухэтапнасць. І гэта галоўны момант. Другі этап — гэта сумоўе з кожным абітурыентам па выніках выкананых заданняў. І адна гісторыя, калі там правільны адказ. То бок тут неабходна толькі будзе выкласці сутнасць, разуменне тэарэтычных аспектаў, звязаных з рашэннем дадзеных заданняў. Плануецца, што будуць ацэньвацца і матывацыйныя аспекты выбару абітурыента ў рамках той ці іншай групы спецыяльнасцей або спецыяльнасці».

Таксама паведамляецца, што ЦТ захаваецца для тых, хто будзе паступаць ва ўніверсітэты не адразу пасля школы. Тэрмін дзеяння сертыфікатаў — два гады. Змены ўступяць у сілу пасля падпіскі адпаведнага ўказа прэзідэнтам.

Вядомы рэпетытар Яўген Лівянт так пракаментаваў гэтую інфармацыю на сваёй старонцы ў Фэйсбуку:

«Мае новыя фразы пры праверцы дамашняга задання абітурыентаў:

— гэта так жа абсурдна, як і новыя правілы ўступнай кампаніі;
— такога трызнення я нават у новых правілах прыёму ў вну не бачыў;
— большая лухта — толькі ў новых правілах паступлення ў вну».