На замову выдавецтва «Кнігазбор» выйшла кніга беларуска-ўкраінскай пісьменніцы Іны Снарскай, паведамляецца на старонцы выдавецтва ў Фэйсбуку. Іна Снарская жыве ва Украіне некалькі дзясяткаў гадоў, з’яўляецца сябрам адразу двух саюзаў пісьменнікаў, украінскага і зліквідаванага сёлета беларускага.

«Гэта падарожжа ў час, калі дрэвы былі вялікімі і хацелася хутчэй вырасці. Гэта падарунак памяці, спроба вярнуцца ў тую першародную чысціню, ранішнюю свядомасць, тое шчырае захапленне светам, любові да ўсяго жывога, у тое „ах“, „няўжо“, „гэта ж трэба“.

„Зачараваны скарб“ — аповесць з аповедаў, якія зацікавяць найперш тых дарослых, каму хочацца ўспомніць сябе дзецьмі. Кожны аповед — ключ. Аповесць пэўнай мераю аўтабіаграфічная, але гэта не традыцыйныя ўспаміны, не эсэ, не апавяданні ў звычайным разуменні, а сінтэз усяго гэтага. Тут жывуць родныя, суседзі, сябры з вёсак маленства аўтаркі на Полаччыне. Кожная гісторыя напісана сэрцам, з вялікай любоўю да сваіх герояў.

У кнігу ўвайшла і маленькая дакументальная аповесць „Мама“, дзе можна пазнаёміцца з добрымі, шчырымі людзьмі, іхнім няпростым шчасцем. Магчыма, нейкай душы на небе стане ад гэтага трохі лягчэй.»

Замовіць кнігу з дастаўкай па Мінску, з дасыланнем па Беларусі і па свеце можна праз інтэрнэт-кнігарні: Knihi.by, Тэхналогія, Kniger.By, Kniganosha.by.

Чытайце яшчэ:

Беларуска-ўкраінская паэтка Іна Снарская: «Пасля гэтай вайны свет стане іншым»