“Канскія львы” – найбуйнейшы ў свеце рэкламны фестываль – застаецца блакітнай, ружовай і іншых колераў марай рэкламшчыкаў з усяго свету. Беларускія ўдзельнікі, дарэчы, “свецяцца” на фестывалі штогод, але 2015 стаў для нашай краіны, яе “маладых Канскіх львоў” (Young Cannes Lions), зорным.
Пра тое, як атрымаць бронзу на галоўным рэкламным фэсце, пераможца Ганна Цішкевіч і сябры апавялі падчас шостага фестывалю ,.!adnak, які штогод ладзіцца кампаніяй “Будзьма беларусамі!” і парталам marketing.by
“Задача, якую паставілі арганізатары фэсту, была няпростай, – расказвае спадарыня Ганна. – Нашай мэтай было натхніць 20 сусветных фінансавых лідараў далучыцца да праграмы барацьбы з малярыяй у Афрыцы”.
Праблема малярыі для Афрыкі надзвычай актуальная – кожную хвіліну ад гэтай хваробы памірае адно дзіця. З іншага боку, калі да праграмы знішчэння хваробы далучацца фінансава забяспечаныя людзі, то ёсць немалыя шансы спыніць хваробу цалкам да 2030 года.
“Ідэя, якая спрацоўвае, мусіць быць вельмі простай, – тлумачаць “бронзавыя” пераможцы. – Пажадана ўкласціся ў так званы фармат твітара – 140 сімвалаў”.
Пра прастату ідэі, якая ў нашыя дні робіцца паспяховай казалі, дарэчы, ледзь не ўсе выкладчыкі адукацыйнай праграмы фестывалю.
“У выніку мы прапанавалі зрабіць спецвыпуск часопіса Forbes, дзе перад спісам самых багатых людзей свету ідуць тысячы прозвішчаў дзяцей, хворых на малярыю. Пад спісам мы звярнуліся да бізнес-супольнасці: “Адна хвіліна вашага часу каштуе вельмі дорага, але ёсць людзі, хвіліна жыцця якіх каштуе яшчэ даражэй”.
“Абыйсці” беларускую прапанову змаглі толькі канадцы і аўстралійцы, тым не менш фота з абвяшчэння тройкі пераможцаў прыносіць пазітыўныя эмоцыі – не кожны раз Беларусь фігуруе ў спісах найлепшых працаў “Канскіх львоў”.
Знайсці падыход да вырашэння праблемы прапанавалася за 40 хвілін.
“Малярыя – хвароба, якая лекуецца проста, аднак праблема для краінаў трэцяга свету застаецца актуальнай”, – кажа Ганна.
Сам працэс ацэнкі працы досыць хуткі – складаная ідэя проста не будзе ўспрымацца за пяць хвілінаў прэзентацыі.
Па словах Ганны, цяпер у рэкламе сябе могуць паспяхова паспрабаваць не толькі прафесіяналы – сярод людзей, у якіх атрымліваецца якасны прадукт, шмат людзей і з іншых сфераў.
“Што да самога Канскага фестывалю, то ён мае непараўнальную атмасферу – крэатыў там ледзь не ў паветры. Аднак распрацаваць ідэю і ўразіць журы за 40 гадзінаў вельмі няпроста”.
Дарэчы, “бронза” – не першая перамога Беларусі на “Львах”: у пазамінулым годзе, а таксама ў 2011-м беларусы здолелі атрымаць срэбра ў намінацыях “дызайн” і “медыі”.
Мікалай Левертаў, фота Marketing.by
