Алесь Тодараў на budzma.org разбіраўся з тым, што такое праблема «сярэдніх» людзей і як яе вырашыць.
Кожны з нас так ці іначай паспеў пабыць у ролі сярэдняга. Звычайна — гэта недзе ў школьныя гады. Нехта такі ў вучобе, нехта знешне, нехта ў амбіцыях.
Арнольд Шварцнэгер, да прыкладу, у залі таксама быў калісьці «сярэднім». Майкл Джэксан быў «сярэднім» спеваком. Майк Тайсан у пачатку сваёй кар’еры быў сярэднім баксёрам. Дональд Трамп і Махатма Гандзі — усе яны таксама калісьці былі сярэднімі.
І пакуль яны знаходзіліся ў гэтым становішчы, аб іх ніхто не ведаў. Жылі яны не так ужо і дрэнна. Усё нармальна, як у людзей. Аднак паспяховымі назваць іх было нельга да той пары, пакуль яны не вырашыліся рызыкнуць і пераскочыць праз бар’ер «здавальняюча».
Гэта ключавы фактар, які адрознівае пасрэднага чалавека ад паспяховага. І гэты бар’ер варта пераадолець вам таксама.
Дапусцім, вы займаецеся ў залі. «Сярэдні» — гэта, калі і мышцы не асабліва баляць, але і вы не асабліва напружваецеся. Не выціскаеце майку пасля трэніроўкі.
Ці, напрыклад, вы рэпер. «Сярэдні» — гэта, калі вы запісваеце трэк без душы. Ён нібыта і нармальны, але пры гэтым і не кепскі, але і не класны.
Ці вы прадпрымальнік. «Сярэдні» — той, хто асабліва не напружваецца. Дзейнічае па завядзёнцы. Выходзіць у невялікі плюс і радуецца, што працуе не ў мінус. І нават не спрабуе рассоўваць свае межы дзеля большага.
Ці вы літаратар. «Сярэдні» — гэта той, хто нешта піша і выдае, але нават не задумваецца аб тым, каб трапіць у адзін шэраг з Янкам Купалам і Якубам Коласам. Яго задавальняе і тое, што ў яго раз на год бяруць інтэрв’ю, а кніжка накладам у пару сотняў экземпляраў мае хоць бы які чытацкі розгалас. Думкі аб тым, каб перавярнуць літаратуру нават і няма...
Вы можаце дабіцца поспеху ў чым заўгодна. Аднак сапраўдны поспех гэта не тады, калі вы нешта навучыліся рабіць больш-менш добра. А тады, калі вы аддаяце яму ўсяго сябе!
Аддаяце душу, апошнія сілы. Не баіцеся рызыкнуць сабой, калі мозг падказвае, што «і так сыдзе». Вам трэба прыдушыць гэты гідкі голас у галаве, які ўвесь час заклікае халтурыць. Ён вас абмяжоўвае і прымушае да таго, каб быць задаволеным «сярэдняй» доляй.
Сапраўдны поспех далей. Вазьміце сябе ў рукі і рабіце! Вы ж насамрэч хочаце большага, а не «сярэдняга». Дык спрабуйце і бярыце!
Чым больш складаны чалавек — тым ён свабаднейшы
Маленькае дзіця зусім эгацэнтрычнае і бачыць свет толькі з аднаго ракурсу. Можа, заўважалі, калі малы прапануе вам паглядзець карцінку, ён паказвае яе так, што відаць толькі яму — бо ён упэўнены, што вы таксама бачыце яе.
Вядомы псіхолаг, даследчык дзіцячай псіхалогіі Жан Піяжэ лічыў найважнейшым этапам развіцця чалавека момант, калі ён становіцца здольным бачыць свет з розных пунктаў гледжання. І чым іх больш, тым больш разнастайным ён бачыць рэальнасць і сябе ў ёй.
Складанае абстрактнае мысленне, здольнасць думаць лагічна, выходзіць за рамкі таго, што можна бачыць і разумець, дазваляе нам адчуваць сябе па-за межамі прынятага.
Змагайцеся за тое, што адрознівае вас ад іншых
Нам усім кажуць «быць сабой». Але ніхто не гаворыць, што за гэта трэба плаціць. Як і ў біялогіі, навакольнае асяроддзе заўсёды будзе спрабаваць прымусіць нас зліцца з умовамі, у якіх мы жывем. Быць самім сабой варта таго, але не чакайце, што гэта будзе лёгка ці бясплатна. Вам давядзецца пастаянна ўкладваць у гэта сваю энергію.
Пашырайце свой кругагляд. Для пачатку, пагаварыце з людзьмі, з якімі ніколі раней не размаўлялі, і зможаце зірнуць на ўласнае жыццё з новага ракурсу. Падарожнічайце, калі ёсць такая магчымасць, хаця б па ўласнай краіне.
Гісторыя і культура Беларусі настолькі багатыя, што каб спасцігнуць іх, можа спатрэбіцца цэлае жыццё. Ды і тое, не пэўны, што яго хопіць. У любім разе наваколле большае за любы, нават самы выдатны падручнік.
Неардынарная асоба — гэта асоба:
— Пазбаўленая «статкавага інстынкту»
Глядзіць на рэчы крыху інакш. Паважае паняцце «індывідуальнасць» і не слухае большасць.
— Валодае «простай мовай»
Выразная ў ідэях, можа за пяць хвілінаў патлумачыць сваю думку. Калі трэба, зробіць накіды і дыяграмы, каб давесці сваю рацыю, без завумных тэрмінаў.
— Пазбягае павярхоўных ведаў
Вывучае рэчы з розных бакоў і з увагай ставіцца да чужых думак.
Задумайцеся: ці вы такая асоба?
Алесь Тодараў, budzma.org
