Песня на верш Максіма Знака, міні-альбом «Разве тут» ад гурта «Разбітае сэрца пацана», доўгачаканы трэк Iva Sativa «Дадому» і шмат іншага цікавага музычнага матэрыялу слухайце і глядзіце ў нашай падборцы беларускамоўных музычных падзеяў за мінулы месяц.
1 «Знакі» — Ганна Шаркунова
«Два гады таму ў стужцы ФБ я ўбачыла ліст Максіма Знака... з турмы. Там ён прасіў каго-небудзь з музыкантаў скласцi мелодыю на яго вершы. У тую ж хвіліну яна і загучала ў маёй галаве. Тэма дзяцей баліць мне асабліва. Дзяцей, якія чакаюць бацькоў з турмаў... Тысяч і тысяч дзяцей, змушаных пакінуць Радзіму разам з бацькамі — у невядомасць.... Цэлае пакаленне дзяцей, якіх Беларусь можа страціць... або ўжо страціла назаўжды... Але мы будзем працягваць кахаць і радавацца, мы будзем убіраць у сябе ўсё лепшае з гэтага вялізнага і яскравага свету. Мы будзем працягваць жыць для нашых дзяцей!.. І абавязкова захаваем ў іх сэрцы часцінку Беларусі... Каб аднойчы вярнуцца разам з імі дадому», — напісала спявачка з нагоды свайго рэлізу.
«Гэтая дарога можа быць доўгай і цяжкай. Яна можа заняць усё жыццё. Але вельмі хочацца сустракаць па дарозе добрыя Знакі. Знакі надзеі, што ўсё абавязкова будзе добра».
2 «Разве тут» — «Разбітае сэрца пацана»
«ЕР гурта РСП «Разве тут» — гэта творчая рэфлексія на тое, што з намі адбылося за апошнія 2-3 гады», — прэзентавалі свой міні-альбом музыкі. — «Пра нашу знешнюю і ўнутраную эміграцыю. Пра перамяшчэнне ў прасторы. Пра змену ладу жыцця. Пра тое, што блізка шмат каму з Беларусі, калі людзі вымушаны ратаваць свае сем’і ад рэжыму і вайны. ЕР складаецца з 4 песень. Гэта вынік нашага супрацоўніцтва з Ярыкам Таміла @riktomito, гукарэж Naviband @naviband, удзельнікам гурта «Панска моц», праекта «Stazhery». Гэта спроба загучаць па-новаму. Больш сінтоў, больш электронна», — напісалі музыкі.
3 «Мара» — Lastoůski і Kristi
«Дзякуй усім, хто ўдзельнічаў у гэтым праекце. Кожны з вас уклаў часцінку сваёй творчасці, каб гэта адбылося. Дзякуй Сусвету, за тое, што даслаў усё гэта мне», — прэзентавалі свой трэк і прыгожы відэашэраг да яго музыкі.
4 «Муж не ідзе» — гурт «Nochy»
«"Муж не ідзе" — гэта беларускі рэйв, а ля фальклорная песня. Я некалі вучылася на "народным аддзяленні" і гэты досвед адлюстроўваецца ў нашых песнях. Тут бытавы жыццёвы тэкст, створаны па канонах фальклору. Дзяўчынка пакутуе ад таго, што ўсё не можа знайсці таго самага, ідэальнага. Атрымаўся такі беларускі рэйв», — распавяла з нагоды рэлізу вакалістка гурта Юлія Петраш.
5 «Спіралі» — «Лайтовы» і SwaggieBloom
Лайтовы і SwaggieBloom выклалі ў сеціва свой міні-альбом «Спіралі».
«Гэта цёплая, вяснова-летняя музыка, якую мы прачулі праз сябе, а цяпер дзелімся з вамі. Няма чаго і дадаць. Галоўнае слухайце і пранікайцеся сонечным сёння», — напісалі музыкі з нагоды рэлізу.
6 «Dadomu» — Iva Sativa
У другой палове красавіка адбыўся доўгачаканы рэліз спявачкі Iva Sativa «Дадому».
«22 сакавіка 2022 года мне напісаў малады хлопец: «Привіт, натрапив на тебе суто випадково, через подружку. Послухав трохи і згадав, що в мене є непоганий етнічний біт. Можеш зацінити, якщо є бажання». І пакуль гэта апошні біт, на які я пісала натхнёна. Увогуле апошні біт, на які я пісала. Дзякуй аўтару за гэта», — распавяла гісторыю ўзнікнення трэка Iva Sativa.
7 «Варажбіт» — Іван Кірчук
Іван Кірчук выклаў у сеціва свой двухгадзінны альбом-аўдыяспектакль «Варажбіт», які складаецца ажно з 55 песняў. Гэта і апрацаваныя народныя спевы, і аўтарскія творы Кірчука, і вершы, і нават гульні. Двухгадзінны рытуал, сеанс сувязі з продкамі, беларуская нацыянальная медытацыя для дасведчаных і неафітаў. Архівы Івана Іванавіча — гэта неацэнны скарб, гукавы экскурс у мінуўшчыну, аўдыядоказ існавання магутнай традыцыі продкаў, якая рызыкуе ў найлепшым выпадку застацца толькі ў музеях. Кірчук паступова гэтыя архівы апрацоўвае і збірае ў аўдыяспектаклі — фактычна адкрывае беларусам беларусаў, — піша пра рэліз тг-канал «Беларуская музыка».
8 «Летуценнік» — Алесь Чумакоў
У красавіку на дысках і флэшках пабачыў свет альбом Алеся Чумакова «Летуценнік». Альбом складаецца з 20 вядомых песень нашага часу, запісаных пад гуслі і па-беларуску. «Што яднае гэтыя песні акрамя таго, што яны — мае любімыя? Мы звыкліся чуць іх іншымі мовамі. А яны актуальныя, пра мяне, пра нас з вамі — толькі перакладзі, як яны пачынаюць распавядаць Нам пра тое, чым мы сёння жывем, аб чым мы марым, хто мы ёсць і куды ідзем. Пагадзіцеся, вам жа хацелася, каб Фрэдзі Мэрк’юры ці Пол Маккартні заспявалі па-беларуску? Каб яны данеслі нам сваю паэзію і філасофію блізка й зразумела, каб пра нас? А вялікі й жахлівы Озі Осбарн? А Віктар Цой? А Юрый Шаўчук? А памятаеце, якое свята было, калі Андрэй Макарэвіч праспяваў нам «Сьнег»? І хацелася яшчэ, яшчэ! Так будзе!», — напісаў музыка з нагоды прэзентацыі альбома.
Сярод песняў замежных выканаўцаў на альбоме пачуем і найвядомейшыя шлягеры «Песняроў», а завершае праграму пераклад з польскай: «Мой любы Гомель», пра тое як можна прайсці ўвесь свет і свой Гомель насіць у сэрцы. Над перакладамі для гэтай праграмы працавалі майстры беларускага слова, паэты, Макс Шчур і Сяржук Сокалаў-Воюш.
Як атрымаць альбом можна даведацца па спасылцы, а падтрымаць музыку можна тут.
9 «Не існуе» — «bayski»
Беларускі рэп-выканаўца bayski ў красавіку пацешыў слухачоў свежым рэлізам «Не існуе».
«Трэк пра хартбрэйк, унутраных дэманаў, каханне і пра тое, што спальваць масты — не заўсёды адзіны правільны шлях, бо жыццё кароткае, а Мінск — адна вялікая вёска. Хто ж ведае, што і дзе цябе яшчэ напаткае? Тэкст прыдумляў я, маё разбітае сэрца і хворая менталка. За гукам, як заўсёды, пільна сачыў мой сябра, Кірыл. Ён накідаў біт, нічога сур’ёзнага не плануючы, а я паспрабаваў дапісаць тэкст і нешта атрымалася», — рапавёў гісторыю трэка музыка.
10 «Знайду» — «Znak Stop»
Таксама ў красавіку беларускі гурт «Znak Stop» прэзентаваў кліп на песню «Знайду». Песня ўвайшла ў міні-альбом гурта «Форма», які складаецца з трох трэкаў. Відэа стварыў Аляксандр Патканян, Stems mastering выканаў Павел Сініла.
Аглядальнік, budzma.org
