Выстава “1+1=69”

22 жніўня 2012 г. у 17.00 у малой зале Музея сучаснага выяўленчага мастацтва (пр.Незалежнасці, 47) адбудзецца адкрыццё выстаўкі графікі Галіны Лазарчык “1+1=69″.

У экспазіцыі гледачы ўбачаць серыю малюнкаў у жанры эратычнай мініяцюры, у якой аўтар удала працуе на працягу апошніх гадоў. Гумар і абагульнёнасць выяваў не пакідаюць месца для пошласці. Мастачка улоўлівае ўсе магчымыя ньюансы асабістага жыцця, у якім ад смешнага да трагічнага – адзін крок.

“Безумоўна, у любыя часы дастаткова часта людзі думаюць пра каханне. Гэта адбываецца незалежна ад роду іх дзейнасці, сацыяльнага ці матэрыяльнага становішча, узросту ці нацыянальнасці. Шматвяковая гісторыя і ўся сусветная культура “напоўнены” ўзаемаадносінамі паміж мужчынай і жанчынай, таму само каханне ўжо выступае як культурная каштоўнасць. Сотні твораў выяўленчага мастацтва, паэзія, а ў наш час таксама тэлебачанне, радыё і інтэрнэт дэманструюць, як чалавецтва прагне кахання. З часам гэта смага не становіцца менш, нягледзячы на магчымую жорсткасць і расчараванні для кожнага чалавека. Успаміны, звязаныя з каханнем, калі і не заўсёды самыя лепшыя, але вельмі моцныя і яркія. Такім чынам тэма кахання прываблівае сваёй невынішчальнай актуальнасцю і шматграннасцю праяў.

У сваіх малюнках мне не хацелася быць аднабаковай, арыентуючыся толькі на ўзнёслыя эмоцыі. Адносіны паміж людзьмі шматгранныя і супярэчлівыя, а значыць, у іх ёсць месца эратызму, грубасці, утрапёнасці, здрадзе і г.д. Лічыцца, што ўсё гэта натуральна, бо ў каханні і наогул у адносінах паміж мужчынам і жанчынай няма нічога непрыстойнага. Цяжка і, напэўна, немагчыма растлумачыць такія шматскладовыя эмоцыі, якія злучыліся ў адным пачуцці. Парадокс кахання ў тым, што дзве істоты складаюць адно цэлае і ўсё ж застаюцца дзвюма істотамі.

Праект пад назвай “1+1=69″ дэманструе як мага большую колькасць бакоў узаемаадносін паміж мужчынам і жанчынай” (Г.Лазарчык).

Галіна Мікалаеўна Лазарчык
25.08.1985 г. нарадзілася ў г. Мінску, Беларусь.
1998-2004 – Мінская дзяржаўная гімназія-каледж мастацтваў.
2004-2009 – Беларуская дзяржаўная акадэмія мастацтваў.

Выстаўка працягнецца па 2 верасня 2012 г.