19 лютага 2018 года а 17-й гадзіне адбудзецца прэзентацыя сумеснага выставачнага праекта Нацыянальнага мастацкага музея Рэспублікі Беларусь і Дзяржаўнага музея ваеннай гісторыі Рэспублікі Беларусь “Айчыне служым!”, прысвечанага 100-годдзю Узброеных Сіл Рэспублікі Беларусь.
У экспазіцыю праекта “Айчыне служым!” у рамках пастаяннай экспазіцыі “Беларускае мастацтва 1940–1960-х гадоў” увайшлі творы жывапісу і графікі класікаў айчыннага мастацтва з фондаў музея, прысвечаныя ваенным і мірным будням беларускага войска.
Акрамя гэтага, Дзяржаўны музей ваеннай гісторыі Рэспублікі Беларусь прадставіць выставу “Гісторыя беларускай арміі”, мэтай якой з’яўляецца фарміраванне найважнейшых духоўна-маральных каштоўнасцей беларускага народа: дзяржаўнасці, патрыятызму, вернасці воінскаму абавязку, гатоўнасці абараняць інтарэсы Радзімы. Выстаўка падрыхтавана сумесна з Міністэрствам абароны Рэспублікі Беларусь, Беларускім грамадскім аб’яднаннем ветэранаў і Федэральнай нацыянальна-культурнай аўтаноміяй беларусаў Расіі. У экспазіцыі прадстаўлены фотаздымкі, якія ілюструюць гісторыю развіцця і станаўлення Беларускай ваеннай акругі і Узброеных Сіл Рэспублікі Беларусь, а таксама ўнікальныя арыгінальныя экспанаты – сцяг “50-я гвардзейская Сталінская двойчы Чырванасцяжная ордэна Суворава стралковая дывізія”, Чырвоны сцяг “Чырванасцяжная Беларуская ваенная акруга”, Чырвоны сцяг “241 стралковаму палку ад УЦВК”, сцяг партызанскай брыгады “Жалязняк”. Пасля экспанавання ў Нацыянальным мастацкім музеі Рэспублікі Беларусь выстава “Гісторыя беларускай арміі” будзе прадстаўлена ў Дзелавым і культурным комплексе Пасольства Рэспублікі Беларусь у Расійскай Федэрацыі (г. Масква).
Праект “Айчыне служым!”, прысвечаны 100-гадоваму юбілею Узброеных Сіл Рэспублікі Беларусь, – гэта выдатная магчымасць выказаць павагу ўсім абаронцам нашай краіны: як героям мінулых гадоў, так і салдатам і афіцэрам сучаснай арміі.