Beat Café. Раўнд першы: “до-рэ-мінск”. Уладзь Лянкевіч

Другі сезон праекта Beat Café – практыкаванняў у спалучэнні небанальных тэкстаў і нефарматнай музыкі ад лепшых людзей мінскай “іншай культуры”.

6 cнежня, cерада.

Beat Café. Раўнд першы: “до-рэ-мінск”. Уладзь Лянкевіч (словы), Юры Навуменка (бас), Раман Цябут (бубны).

Бар “Чердак”. вул. Зыбіцкая, 9. Пачатак а 20.30. Уваход вольны.

Лепшы рокмэн з паэтаў і лепшы паэт з рокмэнаў сваёй генерацыі – Уладзь Лянкевіч са сваім першым паэтычна-музычным выступам з часоў спыненьня дзейнасьці гурту TonqiXod. Лірычны псіхадэл у аздабленні джазавай рытм-секцыі. Адмысловая прапанова для адмысловай публікі.

Макс Жбанкоў, аўтар праекту: «Мы вярнуліся! У самы зручны час: снежань, сцюжа, меланхолія, глінтвейн і ўвесь гэты крыстмас. У самым спрыяльным месцы: бар «Чардак», акурат паміж фэйкавым пафасам Верхняга горада і пантовым чадам Зыбіцкай. Лепшы сезон для чорнага біта. Лепшая зона алка-багемна-блюзавa-літаратурнага нуара. Тут можна думаць міма, гуляць на вылет і рабіць не так. Усё, як мы любім. Адрас новы. Правілы ранейшыя: мяняем асабісты дэпрэсняк на агульны джаз. Цяпер – у «Чердаке».

Beat Café. Для тых, каму за мала проста быць. Паўстагоддзя з лішкам назад – раней за “Бітлз”, В’етнам, джынсавыя клёшы, Вудсток і “Летуценнага вандроўніка” – у барах Сан-Францыска і Нью-Ёрка стваралася новая культура гуку. Керуак, Мінгус, Корсо, Гілеспі, Гінзберг… Дзёрзкія вербальны шэраг рыфмаваўся з ламаным бітам джаза. Паэты свінгавалі, джазеры мыслілі парадоксамі, правакатыўны рэчытатыў spoken word гучаў як праграма пірацкага радыё. Мы гэта прамінулі. У нас такога не было. А цяпер будзе.