Лятучы Ўніверсітэт распачынае год серыяй лекцый “Галоўнае пытанне”
УЛАДЗІМІР МАЦКЕВІЧ
ШТО МОЖНА ВЕДАЦЬ ПРА НЕПРАДКАЗАЛЬНАЕ, АБО ШТО МЫ ВЕДАЕМ ПРА БУДУЧЫНЮ?
30 верасня, 18.30 Галерэя Ў
Што такое невядомае? Гэта ўсё тое, што немагчыма ўбачыць вачыма і памацаць рукамі, што не дадзенае нашым органам пачуццяў. Але дапытлівы чалавечы розум заўсёды – з таго часу як з’явіўся ў Сусвеце – спрабуе пракрасціся ў невядомае, зазірнуць у будучыню.
Чалавек імкнецца прадказваць будучыню праз навуку – “што здарыцца альбо адбудзецца, калі…” Прадказанні ў навуцы будуюцца на дапушчэнні, што ўсё ў Сусвеце падпарадкоўваецца аб’ектыўным законам і пазнанне гэтых законаў дазваляе вылічаць або прадказваць тое, што будзе. Прадказальная сіла навукі грунтуецца на заканамернасці і законаадпаведнасці прыроды і Сусвету.
Пазнаваць і прадказваць будучыню чалавек спрабуе і праз рэлігіі (прынамсі “аўраамічныя” рэлігіі – юдаізм, хрысціянства, іслам). У адрозненні ад навукі, рэлігіі зыходзяць з “тварнасці” або стварэння Сусвету. Раз Сусвет быў створаны, значыць, у Творцы была мэта. Імкнучыся спазнаць гэтую мэту, багаслоўе спрабуе пазнаваць тое, што будзе. Такім чынам, прадказальная сіла рэлігіі грунтуецца на мэтазгоднасці прыроды і Сусвету і на разумнасці і дабрыні Творцы.
Сучасная філасофія зыходзіць з таго, што ні веданне аб’ектыўных законаў, ні ўяўленне пра мэты Творцы, не робяць будучыню прадвызначанай, прадказальнай.
СВЕТ НЕПРАДКАЗАЛЬНЫ. ЯК МАГЧЫМА ЗАЗІРАЦЬ У БУДУЧЫНЮ, КАЛІ ЯНА НЕ МЭТАЗГОДНАЯ І НЕ ЗАКОНААДПАВЕДНАЯ?
30 верасня пра гэта разважае на адкрытай лекцыі “Што можна ведаць пра непрадказальнае, або што мы ведаем пра будучыню?” філосаф, метадолаг Уладзімір Мацкевіч.
Лекцыя пачнецца а 18.30 ў залі Галерэі Ў.
Гэтай прамовай Лятучы ўніверсітэт распачынае новы ўніверсітэцкі год і серыю “Галоўнае пытанне”, cярод лектараў – Алесь Смалянчук, Ігар Бабкоў, Таццяна Вадалажская, Алесь Разанаў, Вячаслаў Бабровіч, Аксана Шэлест, Міхась Баярын, Святлана Карасёва, Ірына Махоўская, Алег Дзярновіч,Міхал Анемпадыстаў.
Лекцыі будуць праходзіць штотыдзень па серадах,пачатак а 18.30. Удзел у іх вольны пры ўмове абавязковай папярэдняй рэгістрацыі (акрамя першай лекцыі 30.09).
Больш падрабязную інфармацыю пра лекцыі – расклад, тэмы, умовы ўдзелу – шукайце на нашым сайце: www.fly-uni.org.
Падпісацца на рассылку анонсаў, задаць пытанні, удакладніць дэталі можна таксама ў нашага каардынатара:[email protected]; +375297422040 (Юлія).
У тэме ліста просьба пазначаць назву серыі “Галоўнае пытанне”.
