Фотавыстава «Даўнія прыбышы: гендарнае вымярэнне стараверскай культуры Паўночнай Беларусі» у Вільні

З 10 лістапада па 5 сьнежня 2024 году ў Беларускім музэі ў Вільні адбудзецца фотавыстава «Даўнія прыбышы: гендарнае вымярэньне стараверскай культуры Паўночнай Беларусі». Выстава — вынік этналягічных экспэдыцыяў, прадпрынятых Уладзіславам Івановым з 2002 па 2015 гады па сучаснай Віцебшчыне.

Дата: з 10 лістапада па 5 снежня

Час адкрыцця фотавыставы: 17:00 (час мясцовы)

Месца: Vilniaus g. 20, Вільня

Гендарнае вымярэньне культуры беларускага стараверства (на прыкладзе старавераў-папоўцаў і беспапоўцаў Віцебшчыны) дагэтуль выяўляе часта закрытыя або малазразумелыя бакі гэтай культуры і дэманструе не толькі багатую гісторыю стараверства Беларусі ў цэлым, але таксама пасьпяховыя спэцыфічныя інтэграцыйныя мадэлі ва ўмовах як новай радзімы, так і зьменлівых, мала спрыяльных захаваньню традыцыйных каштоўнасьцяў сьвету.

Гендарная гісторыя старавераў Віцебшчыны ўключае розныя мадэлі: ад кансэрватыўнай папоўскай стараверскай мадэлі ўзаемаадносінаў мужчынаў і жанчынаў да адкрытай і досыць прагрэсіўнай беспапоўскай стараверскай мадэлі, якая падразумявае між іншым такі фэномэн, як «жаночае духоўнае лідарства».

На выставе апрача гендарнага вымярэньня ўвага скіроўваецца таксама на такі важны аспэкт, як этналёгія і гісторыя (э)міграцыі, выгнаньня, бо ў свой час стараверы зьведалі досьвед выгнаньня, эміграцыі і скрозь час дэманструюць цікавыя мадэлі адаптацыі да новых, часам складаных умоваў жыцьця.