15 жніўня (субота) у межах прыёмнай кампаніі Еўрапейскага каледжа Liberal Arts у Беларусі (ECLAB) адбудзецца майстар-клас Вольгі Раманавай «Як пісаць эсэ?».
Працягласць майстар-класа – з 15.30 да 18.10 (2 пары). Месца правядзення будзе паведамленае ўдзельнікам. Увага! Колькасць месцаў абмежаваная.
Напісанне эсэ – першы этап уступнага конкурсу ў ECLAB. Эсэ – гэта творчая праца на зададзеную тэму, якая дазваляе прыёмнай камісіі ацаніць кругагляд, гнуткасць мыслення, адкрытасць новым ведам, а таксама матываванасць абітурыента, то бок гатоўнасць прыкласці намаганні для паспяховага праходжання курса навучання ў ECLAB.
Акадэмічнае эсэ ўяўляе сабой роздум пра якую-небудзь праблему ў вольнай форме. Тут магчымыя яркія прыклады, публіцыстычныя элементы і мастацкія метафары. Пры гэтым важныя пастаноўка праблемы, этыка цытавання, паслядоўнасць разваг і сістэма аргументацыі.
Майстар-клас будзе складацца з двух этапаў:
1. Афлайн-занятак у групе колькасцю не больш за 15 чалавек.
Удзельнікі майстар-класа пазнаёмяцца з асноўнымі прынцыпамі стварэння даследчых тэкстаў і спецыфікай эсэ як акадэмічнага жанру, а таксама асвояць на практыцы асноўныя этапы і прыёмы яго напісання – ад пастаноўкі праблемы і фармулявання даследчых пытанняў да стварэння разгорнутага плана тэксту.
Выкладчык: Вольга Раманава (кандыдат філалагічных навук, кіраўніца канцэнтрацыі «Масавая культура і медыя» ў ECLAB).
2. Затым удзельнікі майстар-класа могуць самастойна напісаць эсэ, выбраўшы адно з прапанаваных пытанняў. Кожнае эсэ, высланае да 22 жніўня на адрас: liberalarts.by@gmail.com, прачытаюць і ацэняць выкладчыкі ECLAB, якія дадуць свае каментары і рэкамендацыі.
Аўтары эсэ, якія атрымаюць высокую адзнаку, пройдуць першы этап адбору ў ECLAB і будуць запрошаныя на сумоўе, якое адбудзецца ў верасні.
Як запісацца на майстар-клас?
Для таго, каб узяць удзел у майстар-класе, трэба адправіць заяўку на адрас: liberalarts.by@gmail.com з пазнакай «Майстар-клас». У заяўцы трэба пазначыць імя, прозвішча, узрост, род дзейнасці. Дэдлайн падачы заяўкі – 13 жніўня, чацвер, 20:00.
Кошт удзелу ў майстар-класе – 100 000 беларускіх рублёў.
Мерапрыемства ў Facebook
Мерапрыемства ў ВКонтакте
