Прэзентацыя факсімільнага выдання першага “Буквара”

28 жніўня ў Нацыянальнай бібліятэцы Беларусі адбудзецца прэзентацыя факсімільнага выдання першага “Буквара”.

Пасля працяглай працы наша каманда завяршыла рэалізацыю міжнароднага навуковага і выдавецкага праекта па факсімільным узнаўленні першага “Буквара”. Арыгінальнае выданне выйшла роўна 400 гадоў таму назад – у 1618 годзе ў друкарні Віленскага Святадухаўскага брацтва ў Еўі.

Да непасрэднай рэалізацыі праекта далучыліся Пасольства Рэспублікі Беларусь у Вялікабрытаніі, Белдзяржуніверсітэт і Бібліятэка Мідл Тэмпл у Лондане. Арганізацыйную падтрымку забяспечылі Міністэрствы культуры, адукацыі і замежных спраў Рэспублікі Беларусь і Міжнародная асацыяцыя беларусістаў. Партнёрамі ў рэалізацыі праекта сталі Белінвестбанк, Еўрапейскі банк рэканструкцыі і развіцця.

Усяго ў свеце захаваліся два асобнікі ўнікальнага выдання. Адна з кніг захоўваецца ў Бібліятэцы Мідл Тэмпл у Вялікабрытаніі, другай – у Каралеўскай бібліятэцы Даніі. На радзіме не засталося ніводнага выдання: як часта адбываецца з навучальнымі дапаможнікамі, іх проста “зачыталі да дзірак”.

Прэзентацыя факсімільнага выдання пройдзе ў Нацыянальнай бібліятэцы Беларусі напярэдадні Дня ведаў і Дня беларускага пісьменства. І гэта невыпадкова, бо з Буквара пачынаецца шлях да ведаў. Сёння па кнігах з назвай “Буквар” вучацца ў многіх краінах свету.

Маштабны праект па факсімільным узнаўленні выдання 1618 года закліканы зрабіць першы “Буквар” даступным для шырокай аўдыторыі і прадэманстраваць высокую каштоўнасць культурнай спадчыны нашага народа.

Прэзентацыя пачнецца а 16-й гадзіне ў атрыуме 2-га паверха. Цэнтральны ўваход.