Прэзентацыя праекта “CHOICE-Беларусь: спадчына i сучаснасць”

22.09.2015 19:00 - 22:00 Прастора "ЦЭХ" (вул. Кастрычніцкая, 16) Бясплатнае

Асацыяцыя агенцый мясцовай дэмакратыi ALDA (Францыя) сумесна з Міжнародным кансорцыумам “ЕўраБеларусь” (Лiтва) абвяшчае пачатак партнёрскай праграмы “CHOICE” і заклікае ўсіх зацікаўленых да ўдзелу.

За трапнай англамоўнай абрэвіятурай хаваецца двухгадовы  праект  па ахове і пераасэнсаванні культурнай спадчыны і ўзмацненні арганізацыйнага патэнцыялу грамадскіх культурніцкіх арганізацый: “CHOICE – Cultural Heritage: Opportunity for Improving Civic Engagement”. Праект будзе разгортвацца ў Беларусі, Украіне, Малдове і Арменіі ў межах праграмы Усходняга партнёрства, пры iнфармацыйнай і кансультацыйнай падтрымцы арганiзацый-партнёраў: Цэнтра культурнага менеджменту (Львоў, Украіна), Нацыянальнага камітэту ICOM (Кішынёў, Малдова), Адукацыйна-даследчага фонду Millennium (Ерэван, Арменiя) i ГА “Цэнтр сацыяльных інавацый” (Мінск, Беларусь).

Беларуская частка праекту, “CHOICE-Беларусь: спадчына i сучаснасць”, грунтуецца на каштоўнасці культурнай спадчыны як рэсурсу для ўмацавання і развіцця сучаснай беларускай ідэнтычнасці і еўрапейскага цывілізацыйнага выбару Беларусі. Арганiзатары праекту маюць мэтай надаць імпульс пашырэнню разнастайнасці інавацыйных падыходаў і ініцыятыў па ўвядзенні культурнай спадчыны Беларусі ў сучаснае культурнае жыццё беларускага грамадства.

На практыцы гэтыя мэты будуць дасягнутыя праз:

–       падтрымку недзяржаўных культурніцкіх арганізацый і прафесійных супольнасцяў у рэалізацыі інавацыйных праектаў па ахове і актуальнай інтэрпрэтацыі нацыянальнай культурнай спадчыны;

–       павышэнне прафесійных кампетэнцый, арганізацыйнага патэнцыялу і ўзмаценнне ролі грамадскіх арганізацый у фармаванні мясцовага і нацыянальнага культурніцкага асяроддзя і культурнай палітыкі ў краіне.

У праграму праекта ўвойдзе:

–       кансультацыйная падтрымка па арганізацыйным развіцці для заяўнікоў і ўдзельнікаў праекта;

–       тэматычныя дыскусійныя мерапрыемствы і семінары;

–       праграма малых грантаў для праектаў па актуалізацыі культурнай спадчыны;

–       падрыхтоўка аналітычных матэрыялаў (policy paper).

Да ўдзелу запрашаюцца:

1) недзяржаўныя арганізацыі мясцовага і/або нацыянальнага ўзроўню, якія працуюць у сферы мясцовага развіцця, аховы і аднаўлення культурнай спадчыны і культурных ландшафтаў;

2) арганізацыі, групы і супольнасці прафесіяналаў і інтэлектуалаў, дзеячы культуры, заклапочаныя тым, як захаваць культурныя ландшафты і іх разнастайнасць, і забяспечыць устойлівае выкарыстанне рэсурсу культурнай спадчыны для развіцця гарадоў і паселішчаў.

 

Адбор удзельнікаў будзе праходзіць у два асноўныя этапы.

На першым этапе арганізацыям і ініцыятывам, якія жадаюць удзельнічаць у праекце, неабходна падрыхтаваць і даслаць на электронную скрынку eurobelkultura@gmail.com наступныя дакументы :

–       творчую канцэпцыю культурніцкага праекта, у аснове якога – інтэрпрэтацыя, актуалізацыя, рэвіталізацыя матэрыяльнай і нематэрыяльнай культурнай спадчыны Беларусі.

–       папярэдні план свайго арганізацыйнага развіцця.

Форма анкеты і інструкцыя па падрыхтоўцы заяўкі будуць размешчаныя на сайце eurobelarus.info.

Дэдлайн падачы канцэпцый і планаў: 31 кастрычніка 2015.

Дыяпазон  тэматычных накірункаў і фарматаў праектаў можа ўключаць:

– складанне мапаў  аб’ектаў культуры, маршрутаў культурнай спадчыны;

– мабільныя дадаткі для папулярызацыі канкрэтнай культурнай спадчыны;

– прасоўванне сучасных метадаў і тэхналогій аднаўлення культурных ландшафтаў;

– мабілізацыя мясцовых супольнасцяў для прыняцця ўдзелу ў мясцовым планаванні, уплыву на рэалізацыю культурнай палітыкі і яе адсочванне;

– а таксама іншыя інавацыйныя праекты, свежыя творчыя ідэі і амбітныя ініцыятывы, заснаваныя на памкенні аўтараў да прафесійнага росту і ўплыву на культурніцкія працэсы лакальнага i нацыянальнага ўзроўню.

На другім этапе адборуда 20 студзеня 2016 года, арганізацыі з ліку адабраных ўдзельнікаў пры дапамозе кансультантаў і трэнераў будуць распрацоўваць і прадстаўляць прапановы па праекце з падрабязным бюджэтам, а таксама дапрацоўваць заяўленыя планы свайго арганізацыйнага развіцця.

Адабраныя ўдзельнікі атрымаюць таксама магчымасць прыняць удзел у прафесійных семінарах і міні-стажыроўках у профільных арганізацыях у Беларусі, Украіне, Малдове і Арменіі, а таксама рэалізаваць сумесныя праекты з партнёрамі з гэтых краін.

Атрымаць больш поўную інфармацыю аб праекце, яго магчымасцях  і ўмовах удзелу можна будзе ад саміх каардынатараў на  афiцыйнай  прэзентацыі “CHOICE-Беларусь: Спадчына і сучаснасць”, якая адбудзецца 22 верасня ў культурнай прасторы “ЦЭХ” а 19:00. Уваход вольны.

***

Прэзентацыя праекта “CHOICE-Беларусь: спадчына i сучаснасць”

Дата:

22 верасня 2015 г.

 

Месца:

ЦЭХ: вул. Кастрычніцкая, 16, 2 паверх.

19:00.

ФОТА – Віктар Малышчыц (крыніца: tech.onliner.by)


Вам можа быць цікава

Выстава Васіля Зянько «Паэзія кропак...» у Мінску

29.01.2025 18:00 - 02.03.2025 19:00 арт-гасцёўня «Высокае месца» (вул. Герцэна, 2а)

Выстава «Страх і смех» у Вільні

30.01.2025 18:30 - 14.02.2025 19:00 Цэнтр беларускай культуры і супольнасці (Vilniaus, 20)

Провады Снягуркі ў Белавежскай пушчы

15.02.2025 (11:00 - 16:00) Нацпарк «Белавежская пушча»

Этнавечарына «Зіма з летам сустракалася...» у Гомелі

15.02.2025 (16:00 - 18:00) філіял Веткаўскага музея (плошча Леніна, 4а)

Апошняе
на Budzma.org

чытаць яшчэ