Серыялы пра эмігрантаў, рэжым ва Усходняй Еўропе і працяг «Сапраўднага дэтэктыва». Budzma.org распавядае, якія серыялы чакаць сёлета. Некаторыя з іх з'явяцца на пляцоўках зусім хутка і дапамогуць бавіць час у марозныя студзеньскія вечары.
«Экспаты» (Expats)
Жанр: драма
Рэжысёр: Лулу Ван
Тэма серыяла, магчыма, адгукнецца многім беларусам, бо «Экспаты» — фільм пра жанчын-іншаземак, якія пераехалі ў Ганконг. Прывялі іх туды розныя прычыны: хтосьці прыехаў, каб рэалізаваць сябе, а хтосьці — каб збегчы ад мінулага жыцця. У любым выпадку ўсе яны перажываюць няпростую адаптацыю ў краіне, якая зусім не падобная на месцы, адкуль яны родам.
Адну з галоўных роляў у фільме выконвае сусветная зорка кіно — Ніколь Кідман.
Сусветная прэмʼера «Экспатаў» адбылася ў канцы 2023 года, а на стрымінгавых пляцоўках фільм зʼявіцца ўжо ў студзені.
«Містэр і місіс Сміт» (Mr. & Mrs. Smith)
Жанр: баявік, камедыя
Рэжысёр: Крысціян Спрэнгер
Напэўна, усе памятаюць аднайменны фільм, дзе Анджэліна Джолі і Брэд Піт граюць агентаў, якім замовілі забіць адно аднаго. Але ёсць адзін нюанс: пара нядаўна ажанілася. Муж і жонка нават уявіць сабе не маглі, што яны абое працуюць на сакрэтную арганізацыю.
У серыяле сюжэт трохі зменены: галоўныя героі ўступаюць у фіктыўны шлюб, каб працаваць пад прыкрыццём. А што з гэтага выйшла — можна будзе даведацца ў лютым, калі фільм зʼявіцца на стрымінгавых пляцоўках.
«Спагадлівы» (The Sympathizer)
Жанр: ваенная драма
Рэжысёр: Пак Чхан Ук
Рэжысёр Пак Чхан Ук, вядомы па вострасюжэтных фільмах «Олдбой», «Спачуванне спадарыні Помста» і «Служанка», апошнія гады спрабуе сябе ў серыяльным жанры.
«Спагадлівы» — зняты па рамане пісьменніка і лаўрэта Пулітцэраўскай прэміі Вʼета Тхань Нгуена. Галоўны герой — вʼетнамскі агент, які працуе ў ЗША ў сярэдзіне 1970-х гадоў.
У фільме зняўся адзін з найпапулярнейшых акцёраў Галівуда — Роберт Даўні-малодшы.
«Сапраўдны дэтэктыў» (True Detective)
Жанр: крымінал
Рэжысёр: Нік Піцалата
1-шы сезон «Сапраўднага дэтэктыва» выйшаў у 2014 годзе і стаў адным з найлепшых крымінальных серыялаў дзесяцігоддзя. А фразы дэпрэсіўна-іранічнага следчага, якога сыграў Мэцью МакКонахі, разабралі на цытаты.
Аўтарам атрымалася стварыць унікальную нуарную атмасферу. Усе тры сезоны зацягваюць гледача ў змрочны свет «Сапраўднага дэтэктыва».
І вось пасля сямігадовага перапынку серыял вырашылі падоўжыць на 4-ты сезон. Гэтым разам сюжэт будзе разгортвацца ў заснежанай Алясцы, дзе бясследна знікаюць шасцёра мужчын, якія працавалі на навукова-даследчай станцыі. Расследаваць справу давядзецца дзвюм жанчынам-паліцыянткам.
«Рэжым» (The Palase)
Жанр: драма, камедыя
Рэжысёр: Стывен Фрырс, Джэсіка Хобс
Ва Усходняй Еўропе падае аўтарытарны рэжым... Не, гэта гісторыя не пра Беларусь, хоць не выключаем, што пры стварэнні серыяла, аўтары вывучалі і гэты кантэкст.
Тым не менш дзеянні адбываюцца ў выдуманай краіне. Гэта сатырычны фільм пра ўладу, прапаганду і палітычныя інтрыгі з удзелам Кейт Уінслет і Хʼю Гранта.
Серыял будзе даступны на стрымінгавых пляцоўках ужо ў сакавіку гэтага года.
Марта Радушкевіч, budzma,org
