У пятніцу, 13-га студзеня ў сталічнай бібліятэцы імя Цёткі (загадчыца Рэгіна Багамолава) паэтычны тэатр “ART.-S” у працяг свайго 12-гадовага праекту “Святкуйма беларускае!” і насуперак кітайскай, усходняй традыцыі абвясьціў беларускі 2017 год годам Аксамітнага Мятліка, а не Вогненага Пеўня.
Беларускі паэтычна-міфалагічны каляндар ствараецца тэатрам ужо не адзін год. Так, 2009-ы абвяшчаўся годам Багоўкі (“на Беларусі Бог жыве!”), 2010-ы – годам Зялёнай Жабкі, 2011-ы – годам Вогненага Вожыка, 2012-ы – годам Арэхавай Вавёркі, 2013-ы – годам Зорнай Рысі, 2014-ы – годам Срэбнага Бабра, 2015-ы – годам Беласьнежнай Казы, а 2016-ы – годам Чорна-белага Бусла.
Пачалася вечарына ўступным словам аўтараў ідэі, сцэнарыстаў і вядоўцаў – сямейнага трыа Альжбеты, Аксаны і Яраша Малішэўскіх-Спрынчан, у якім натуральна гучалі вершы пра мятлікаў Максіма Багдановіча, Антона Бялевіча і Рыгора Барадуліна.
Вядоўцы расказвалі пра розных прадстаўнікоў гэтай жамяры, што вядуцца на Беларусі, і прызначалі-прадстаўлялі выступоўцаў у іх вобразах. Сама Аксана Спрынчан была за Сенніцу Геру, Віктар Шніп – за Апалона, Альжбэта Малішэўская-Спрынчан – за Стужку малінавую Ордэнскую, Юрась Нераток – за Бражніка Мёртвую Галаву, Людка Сільнова – за Блакітніцу Ікар, Віка Трэнас – за Жалобніцу, Ірына Клімковіч – за Мнемазіну, Уладзімір Сіўчыкаў – за Адмірала, Максім Клімковіч – за Махаона, Яраш Малішэўскі – за Падалірыя, Людміла Шчэрба – за Павінае Вока Малое Начное, Таццяна Будовіч (Тадора Шпілька) – за Пераліўніцу Вялікую…
Кожны чытаў вершы, сьпяваў песьні, апавядаў легенды ці паданні, расказваў пра пэўныя матыльковыя прыгоды. Акрым усяго Рэгіна Багамолава (Мядзьведзіца-гаспадыня) нагадала гасьцям бібліятэкі, што сёлета адзначацьмуцца 500-годдзе беларускага кнігадруку і 140-годдзе Цёткі, Максім Клімковіч пераказаў сваю казку-жахалку, а аўтар гэтых радкоў падзяліўся зусім не летуценнымі, а таму нечаканымі гісторыям са свайго далёкага ўжо вайсковага жыцьця, якія падхапіў Яраш Малішэўскі.
Але знайшліся на паэтычна-міфалагічным сьвяце месцы і жартам, і калядным песьням з імправізаваным калядаваньнем (у торбу калядоўшчыкаў патрапілі і падарункі ад кампаніі “Будзьма беларусамі!”), і літаратурнаму конкурсу на “матыліную” тэму, і нават “Купалінцы” па-французску. Завершылася вечарына традыцыйнымі калектыўнымі здымкамі на ўспамін фотамастакоў Васіля Кузьмічкіна і Міколы Лінніка.
Уладзімір Сіўчыкаў