Анатомия ненависти. (Русско-польские конфликты в XVIII — XX вв). /А.Е. Тарас. — Минск.; Харвест, 2008. — 832 с.: илл. — (Серия “Неизвестные войны)

Ад 19 лютага ў менскіх кнігарнях “Светач” (пр-т Пераможцаў, 11); “Акадэмкніга” (пр-т Незалежнасьці, 72); “Цэнтральная” (пр-т Незалежнасьці, 19).

Анатоль Тарас адмыслова для сайту “Будзьма разам”:

— Да нядаўняга мінулага пад выглядам гісторыі народаў СССР мы вучылі гісторыю маскоўскай дзяржаўнасьці. Натуральна, вучылі міфалагізаваную гісторыю, бо кожная імпэрыя будуе гісторыю выключна на міфах. Таксама кожная імпэрыя існуе толькі калі стварае зьнешніх ворагаў. Расейская імпэрыя выбрала для сябе сярод вобразаў ворага Польшчу.

У сваёй кнізе я дасьледую не адносіны між народамі, а адносіны між дзяржавамі: між Варшавай і Масквой. І я сьцьвярджаю, што практычна ўвесь час ад сярэдзіны XVII па канец XX стст Польшча была ахвярай імпэрскіх амбіцый Масквы.

У напісаньні кнігі я адмыслова базаваўся на гістарычных працах найперш расейскіх дасьледчыкаў. Інакш бы мяне абвінавацілі ў прадажнасьці за польскія грошы, “заакіянскіх гаспадароў”, ці ўвогуле “жыда-масонскіх груповак”.

З прадмовы аўтара:

“Усе нацыянальныя дзяржавы ў розны час мелі этап падвышанай цікавасьці да сваёй гісторыі. Гэта натуральна, бо толькі веданьне ўласных каранёў надае нацыі і дзяржаве трываласьць. Сёньня перад беларускімі гісторыкамі стаіць пытаньне не пра перапісваньне гісторыі, але наадварот — пра ачышчэньне беларускай гісторыі, і шчыльна зьвязаных зь ёю гісторый Польшчы, Літвы і Ўкраіны ад вялічэзных напластаваньняў ілжы”.

З анатацыі да кнігі:

“Кніга добра ілюстраваная: яна ўтрымлівае мапы, унікальныя малюнкі і фотаздымкі, рэпрадукцыі мастацкіх карцін. Яна разьлічаная на шырокае кола чытачоў: ад вучняў старэйшых клясаў да прафэсійных гісторыкаў”.

P.S. Анатоль Тарас выбухнуў мінулай восеньню кнігай «История имперских отношений: белорусы и русские».

P.P.S.Прэзэнтацыя “Анатоміі нянавісьці” адбудзецца 26 лютага ў сядзібе Таварыства Беларускай Мовы (Менск, вул. Румянцава, 13).