Беларускія стравы часта згадваюцца ў творах айчыннай літаратуры. Гэта і апісанні застолляў беларускай шляхты, і пералік святочных страваў на стале простых жыхароў вёсак і мястэчак. У вершах, паэмах і празаічных творах згадваюцца традыцыйныя беларускія стравы з мяса, гародніны, а таксама з усяго таго, што трапляла на стол з лесу, ракі ці возера.
Вядома, не апошняе месца на стале літаратурных герояў займалі стравы з самай «беларускай» гародніны — бульбы. Адна з такіх страваў — бабка. Акурат яе згадвае ў сваёй паэме «Родныя дзеці» Ніл Гілевіч, пералічваючы стравы на святочным стале.
Паспеў адчуць, што ўжо не слабка
І ў паясніцы, — а на стол
Тым часам едзе ў місе бабка
І парай дыхае пад столь:
З бакоў запечаная ў меру,
У бульбе скварачкі тырчаць...
І так жа ўслед пайшла на змену
— Хоць замычы — каб не маўчаць!
Ну што, слінкі ўжо пабеглі ад такога апісання? Пагадзіцеся, умеў шаноўны Ніл Сымонавіч словамі смачную карцінку стварыць! Але сёння не пра апісанне, а пра прыгатаванне. Прапануем прыгатаваць бабку менавіта так, як апісваў Ніл Гілевіч — запечаную ў меру, са скварачкамі. Страва гэтая зусім нескладаная. Нават калі раней вы яе не гатавалі, упэўнены, што прачытаўшы нашыя парады, вы згатуеце такую страву, што не толькі родныя дзеці збягуцца на смачныя пахі, але і суседзі.
Што за страва — бабка
Бабка — класічная запяканка з гародніны. Гэтая страва вядомая ў кухнях нашых суседзяў — польскай, літоўскай і, вядома ж, яўрэйскай. У беларускай кухні ў якасці асновы для бабкі традыцыйна выкарыстоўваецца бульба.
У якасці начынкі можна выкарыстоўваць засмажанаую з цыбуляй грудзінку альбо смажаныя грыбы. Падаюць бабку з салёнымі агуркамі, грыбамі ці квашанай капустай. Як варыянт, гэта можа быць смятана ці любая поліўка. А камусьці можа спадабацца варыянт бабкі з халодным малаком. Так, страву гэтую не назавеш дыетычнай, але халоднымі зімовымі вечарамі часам бывае не да дыетаў. Каб абмежаваць колькасць калорый, варта спыніцца на варыянтах падачы бабкі без смятаны і полівак.
Як гатаваць
Прадукты на 4 порцыі:
10–12 сярэдніх бульбін
1 цыбуліна
2 сталовыя лыжкі смятаны
30–50 грамаў сметанковага масла
150 грамаў салёнай грудзінкі
2 сталовыя лыжкі мукі
1,5–2 сталовыя лыжкі паніровачных сухароў
Соль, спецыі
Алей для змазвання формы
Для прыгатавання бабкі спатрэбіцца 10–12 сярэдніх бульбін. Пасля націрання бульбы на тарку можа выдзеліцца дастаткова шмат соку, таму масу пры жаданні можна трошкі адціснуць. Для таго, каб бабка атрымалася не сухая, у «цеста» можна дадаць пару лыжак смятаны і невялікі кавалачак сметанковага масла.
Сам працэс прыгатавання дастаткова просты і не займае шмат часу. Абіраем бульбу, адну цыбуліну і наразаем грудзінку на дробныя кубікі. Сала абсмажваем на патэльні, дробна пасечаную цыбулю дадаем за 2–3 хвіліны да канца абсмажвання.
За гэты час націраем бульбу на тарку — дробную ці сярэднюю. Адціскаем па неабходнасці лішнюю вадкасць. Дадаем у бульбу смятану, масла, цыбулю з грудзінкай і муку. Солім, дадаем іншыя прыправы і перамешваем.
Калі вы любіце гатаваць разам з дзецьмі, то ў выпадку з бабкай ім можна даверыць найменш траўманебяспечны працэс — перамешванне бульбы з астатнімі інгрэдыентамі. Можна нават рукамі.
Форму, у якой будзем запякаць, змазваем алеем і абсыпаем паніровачнымі сухарамі. Выкладваем бульбу ў форму і ставім у духоўку (ці печ — калі яна ў вас ёсць) на 25–30 хвілін. Тэмпературу выстаўляем 180–200 градусаў.
Момант, калі бабка ўжо амаль гатовая, прапусціць складана — пахі з духоўкі гарантавана прыцягнуць на кухню ўсіх, хто апынецца побач.
Смачна есці!
ПП, budzma.org
