Беларускую асацыяцыю журналістаў уганаравалі прэміяй «Свабода прэсы 2022» ад шведскай арганізацыі «Рэпарцёры без межаў». Прэмію ўручаць да Міжнароднага дня свабоды прэсы 3 траўня.
Эрык Халькяер, кіраўнік «Рэпарцёраў без межаў» у Швецыі адзначыў, што БАЖ у поўнай меры заслугоўвае гэтай узнагароды.
«Нягледзячы на тое, што цяпер у цэнтры ўвагі Украіна, жорсткія рэпрэсіі супраць журналістаў у Беларусі працягваюцца, і БАЖ адыгрывае вырашальную ролю ў інфармаванні свету аб таталітарных злоўжываннях супраць журналістаў у Еўропе», — заявіў ён.
Нагадаем, учора з’явілася інфармацыя, што БАЖ стала лаўрэатам Сусветнай прэміі ЮНЕСКА / Гільерма Кано за абарону свабоды прэсы.
БАЖ працуе з 1995 года. Яна аб’ядноўвае беларускіх журналістаў, з’яўляецца чальцом Міжнароднай федэрацыі журналістаў (IFJ) і Еўрапейскай федэрацыі журналістаў (EFJ). У 2021 годзе ў офісах БАЖ неаднаразова праводзіліся ператрусы. У выніку арганізацыя была афіцыйна ліквідаваная Мінюстам.
