Калі ў гэтым цудоўным украінскім горадзе ў вас ёсць знаёмыя, якія цікавяцца нашай літаратурай, скажыце ім, каб не адкладалі на апошняе наведванне беларускага стэнда: кнігі тут раскупаюцца вельмі хутка!
Сёлета беларуская “кніжная амбасада” выглядае больш прадстаўніча, чым летась. Павільён, аформлены ў аранжавых колерах і адной стылістыцы, знаходзіцца фактычна ў цэнтры трэцяга паверха Палаца мастацтваў. Беларускі стэнд працуе цягам усяго Форуму выдаўцоў: з 15 па 18 верасня.
Праект “Books from Belarus” разам з серыяй “Беларускі кнігазбор” і часопісам ARCHE прывезлі дзясяткі найменняў кніг для дзяцей і дарослых.
Прадстаўнік часопіса ARCHE кажа, што ўкраінцы ў асноўным пытаюцца пра гістарычную літаратуру самых розных перыядаў, у тым ліку першакрыніцы: хронікі і летапісы.
Адзін пакупнік – салідны спадар, які аказаўся епіскапам Украінскай Аўтакефальнай царквы з Ужгарада, – набыў адразу тры кнігі гісторыка Мікалая Плавінскага. Чаму менавіта такі выбар?
“Бо беларусы – адзіны народ, з якім мы апошнія 1000 гадоў не ваюем”, – пажартаваў ён у адказ.
Акрамя кніг “Books from Belarus” прывёз у Львоў жывыя сустрэчы з беларускімі аўтарамі. 16 верасня ў каміннай зале гатэля “Жорж” адбудзецца прэзентацыі творчасці Валянціны Аксак і Алеся Пашкевіча. 17 верасня ў кнігарні “Книжковий лев” на вул. Шэўскай, 6 чакаецца дыскусія “Сучасная беларуская літаратура: тэмы і выклікі” з удзелам Валянціны Аксак, Алеся Пашкевіча, Барыса Пятровіча, Марыі Роўды. Таксама ў гэты ж дзень у гастра-пабе “LUFT” пройдзе прэзентацыя творчасці Барыса Пятровіча і Марыі Роўды.
Х.М.
