Эдуард Акулін і Леанід Дранько-Майсюк 24 чэрвеня з творчым візітам наведалі Мядзельшчыну. Тут паэты правялі чатыры літаратурныя сустрэчы: у Выгалавіцкай базавай школе, у Доме культуры вёскі Сваткі, у Мядзельскай гімназіі №1 і Мядзельскай цэнтральнай раённай бібліятэцы.
Сваімі ўражаннямі ад вандроўкі падзяліўся паэт Леанід Дранько-Майсюк: “Прыемным сюрпрызам для мяне стала выступленне ў сваткаўскім Доме культуры. Тут да нашага творчага тандэму нечакана далучыўся мясцовы фальклорны ансамбль і абсалютна бліскуча выканаў дзве маіх любімых песні: ”Польку беларускую” і “Бульбу”. Іх песеннаму тэмпераменту, пазітыўнай энергетыцы выканання, а самае галоўнае, шчырай любові да беларускай песні маглі б павучыцца і сталічныя артысты…”
“І калі ў Выгалавічах і Мядзелі мы выступалі перад вучнямі, якія адпачываюць у аздараўляльна-спартыўных летніках, то на сустрэчу ў Сватах, нягледзячы на самы разгар “агароднага” сезону, сабраліся людзі самага рознага веку і жыццёвага досведу, – дадаў Эдуард Акулін. – А яшчэ нам пашчасціла наведаць вёску Навікі, каб пакланіцца магіле славутага песняра нарачанскага краю Максіма Танка”, – рэзюмаваў паэт-бард.
Літаратурнае турнэ па Мядзельшчыне адбылося ў межах кампаніі “Будзьма беларусамі!”
