Былога кіраўніка «Аховы птушак Бацькаўшчыны», навукоўца-арнітолага Віктара Фенчука затрымалі 1 верасня 2021 года, нагадвае«Зялёны партал».
Яго абвінавацілі па артыкуле «Арганізацыя і падрыхтоўка дзеянняў, якія груба парушаюць грамадскі парадак». Падставай для абвінавачвання паслужылі некалькі фота з пратэстных маршаў, у якіх удзельнічаў Фянчук.
Па словах дзяржабвінаваўцы, «такія паводзіны чалавека, які прадстаўляе Беларусь на міжнароднай арэне, проста не дапушчальныя».
Суд асудзіў навукоўца на 2,5 гады калоніі агульнага рэжыму, залічыўшы час у СІЗА як дзень за паўтара. Такім чынам Фенчуку застанецца правесці ў зняволенні каля паўтара года.
Што тычыцца пазову Мінсктранса ў памеры 196 тысяч 319 рублёў і 74 капеек, то суд вылучыў яго ў асобную вытворчасць.
Фянчук узначальваў АПБ з 2007 па 2014 год, потым быў яе супрацоўнікам. Увосень 2020 года ён ужо адседзеў 15 дзён за ўдзел у пратэстным маршы ў Мінску.
«Ахова птушак Бацькаўшчыны» — адна з найбуйнейшых прыродаахоўных арганізацый Беларусі, якая больш за 20 гадоў займалася аховай птушак і захаваннем біяразнастайнасці ў краіне. Арганізацыя страціла афіцыйны юрыдычны статус у сакавіку 2022 года.
Арганізацыю абвінавацілі ў тым, што яна «пад выглядам валанцёрства па выратаванні птушак на тэрыторыі Рэспублікі Беларусь ажыццяўляе экстрэмісцкую дзейнасць, накіраваную на дэстабілізацыю грамадска-палітычнага становішча ў краіне».
У прыватнасці, АПБ абвінавачвалі ў тым, што яна публічна падтрымлівае пратэстную актыўнасць, выкарыстоўваючы выраз «Птушкі з народам».
