Арганізатары конкурсу прынялі рашэньне аб правядзеньні сэрыі жывых канцэртаў фіналістаў конкурсу «Засьпявай 2.0», якія пройдуць улетку на тэрасе кавярні Chill Out на плошчы Свабоды ў Менску.
Ідэя аб правядзеньні жывых канцэртаў зьявілася падчас праслухоўваньня заяваў ад удзельнікаў конкурсу «Засьпявай 2.0». «Можна вызначыць найлепшых паводле праслухоўваньня дэма ў інтэрнэце. Але гэта будзе прыблізна, на вока, – кажа прадусар конкурсу Сяргей Будкін. – Жывое выкананьне дазваляе разгледзіць нюансы, якія нерэальна ўбачыць у прадастаўленых запісах, зробленых часам проста на тэлефон. І мы вельмі ўдзячны кавярні Chill Out, якая гатова прадаставіць пляцоўку для выступаў канкурсантаў. Такім чынам маладыя артысты змогуць паказацца перад публікай, што ўжо само па сабе каштоўна. А па выніку іх выступаў мы назавем самых-самых».
Сябры журы «Засьпявай 2.0» вызначаць 12 імёнаў – па шэсьць вартых увагі канкурсантаў у кожнай з намінацыяў – «Кавэр» і «Сьпяваная паэзія». Яны і атрымаюць магчымасьць выступіць з сэтам на тэрасе Chill Out на плошчы Свабоды гэтым летам пры падтрымцы ўжо вядомых выканаўцаў. Частка сябраў журы ўжо вызначылася і зрабіла свае высновы. «Конкурс дазволіў зразумець некалькі істотных рэчаў, – кажа культуроляг Максім Жбанкоў. – Перадусім: актуальны беларускі сонгбук гучыць разнастайна ды атракцыйна, удала перабіваючы інэрцыю савецкіх дзяржэстрады ды “альтэрнатывы”. Па-другое, маем моцную “сьпяваную паэзію”, але слаба ведаем, як рабіць кавэры: большасьць старанна перапявала арыгінальныя вэрсіі (можа, спадар Моўчан напалохаў?). Гэта, дарэчы, сьведчыць аб узроўні свабоды творчасьці: падобна на тое, што яна ў нас амаль па-за правам. Па-трэцяе, ўдзельнікі дакладна падзяліліся на тры несумяшчальныя групоўкі: “народныя артысты” (клясычная самадзейнасьць), “славянскія базары” (олдскульны дзяржпопс-гэвімэтал-рэстаран) і “прасунутыя аутсайдэры” (песьні ды скокі гарадзкіх партызан). Дзіўна, што ім давялося спаборнічаць паміж сабой – варта была б зрабіць тры адмысловыя намінацыі. Альбо тры адмысловыя конкурсы. І яшчэ шкада, што замала ўзнагарод. Я бы ўшанаваў кожнага з майго шорт-ліста».
А вось некаторым сябрам журы выбар зрабіць няпроста. «Я ня ўмею так судзіць, бо гэта несур’ёзна. Журы мусіць сядзець у залі і слухаць жывыя галасы. Ну ў скрайнім выпадку мёртвыя. Але абіраць урыўкамі на гастролях у інтэрнэце досыць цяжка», – заўважае заслужаны артыст Беларусі Валеры Дайнека. Лідэр гурта «Палац» Алег Хаменка падчас праслухоўваньня песень канкурсантаў наогул перажыў увесь спэктр пачуцьцяў: «Пакуль слухаў і аналізаваў творы адчуў, напэўна, усе эмоцыі, якія ёсьць. Сьмяяўся і злаваўся, сумаваў і весяліўся, зачароваўся і расчароўваўся. Перш за ўсё хачу сказаць тым, хто не перамог. Вашыя творы вартыя запісу і прамоўшэну. Ня здраджвайце ім!».
Такім чынам, журы абяцае канчаткова вызначыцца з «шчасьлівай дванаццаткай» фіналістаў «Засьпявай 2.0» цягам наступнага тыдня. Сачыце за навінамі на Tuzin.fm!
