Студэнты беларускіх ВНУ запрашаюцца да ўдзелу ў фотаконкурсе на тэму архітэктурных, гістарычных і прыродных славутасцяў Беларусі. Пераможцы атрымаюць магчымасць бясплатнага навучання ў Краснаборскай школе фатаграфіі ў вядомых беларускіх фотамастакоў. А ў якасці дадатковага бонуса — магчымасць сфатаграфаваць дзікіх жывёл у натуральных умовах.
Дэдлайн для падачы работ 10 жніўня.
Падвядзенне вынікаў будзе праводзіцца па кожнай вобласці асобна. Такім чынам будзе 6 пераможцаў ад абласцей і адзін ад Мінска.
Яны атрымаюць магчымасць паехаць на навучанне ў «Чырвоны Бор» зусім хутка — з 20-га па 30-га жніўня.
Але самае галоўнае: у пераможцаў будзе магчымасць павучыцца ў масцітых фатографаў і павысіць сваё майстэрства. Майстар-класы і практычныя заданні будуць праводзіць:
- Сяргей Плыткевіч, дырэктар выдавецтва «Рыфтур», аўтар шматлікіх фотаальбомаў пра Беларусь;
- Ірэна Гудзіеўская, фотамастак, майстар рэкламнай фатаграфіі;
- Віктар Малышчыц, фотамастак, майстар панарамнай фатаграфіі і здымак зорнага неба;
- Сяргей Грыц, фотакарэспандэнт, які здымаў баявыя дзеянні ў Афганістан Іраку;
- Ганна Цясёлкіна, рэжысёр, аўтар рэкламных ролікаў і іншыя прафесіяналы.
Перад вучнямі фоташколы адкрыюцца самыя запаведныя месцы Краснаборскай пушчы — у суправаджэнні егераў паляўнічай гаспадаркі «Чырвоны Бор» ім будзе прадастаўлена магчымасць сфатаграфаваць дзікіх жывёл у натуральных умовах.
Так выглядаюць гасцініца «Ізубрыца» і «Карчма «Ізубрыца», дзе будуць жыць і харчавацца пераможцы конкурсу.
Рака Свольна, па якой будзе арганізаваны сплаў на байдарках.
Вучні фоташколы сустрэнуцца з дырэктарам карціннай галерэі Нацыянальнага Полацкага гісторыка-культурнага музея Ларысай Лысенкай і змогуць атрымаць адказы на пытанні, як арганізаваць сваю персанальную фотавыставу.
Па выніках конкурсу і адбору лепшых работ, зробленых падчас навучання ў Краснаборскай школе фатаграфіі, у лістападзе 2022 года ў Нацыянальным гістарычным музеі будзе арганізавана фотавыстава.
Ёсць ахвочыя прыняць удзел у конкурсе? Запоўніце заяўку і дашліце на email: [email protected]
Пазнаёміцца з палажэннем аб конкурсе і запоўніць заяўку можна тут.
Фотаконкурс пад назвай «Маладзёжны погляд» праводзіцца Рэспубліканскім фондам развіцця турызму і падтрымкі дзікай прыроды «Планета без межаў» сумесна з Міністэрствам адукацыі Рэспублікі Беларусь, Нацыянальным гістарычным музеем і ТАА «Жамчужына Паазер’я».
Фонд «Планета без межаў» і выдавецтва «Рыфтур» больш за шэсць гадоў працуюць над стварэннем нацыянальнага краязнаўчага партала «Планета Беларусь», на якім павінны быць прадстаўлены ўсе гістарычныя, архітэктурныя і прыродныя славутасці нашай краіны. Гэта адзіны інтэрнэт-рэсурс у Беларусі, дзе ёсць дэталёвыя старонкі з контурамі ўсіх населеных пунктаў Беларусі, існуе магчымасць падарожнікам самім ствараць свае маршруты і бачыць, якія славутасці ёсць па дарозе, дзе можна пераначаваць, паесці, купіць сувеніры. «Маладзёжны погляд» па задумцы ініцыятараў конкурсу павінен падштурхнуць у маладога пакалення жаданне падарожнічаць па роднай краіне.
