Арганізатары міжнароднага этна-фестывалю “Вольнае паветра” абвесцілі , што мерапрыемства адбудзецца 27 жніўня. У яго межах на некалькіх сцэнах выступяць выканаўцы актуальнай этна-музыкі з Сербіі, Польшчы, Расіі, Літвы, Украіны і Беларусі.
“Мы атрымалі ўсе неабходныя дазволы мясцовых уладаў, праваахоўных органаў, дасягнулі дамоўленасці з усімі неабходнымі тэхнічнымі і бытавымі службамі. Таму гледачы ўжо могуць планаваць сваю паездку на фестываль. Квіткі ў продажы”, – паведаміў арганізатар мерапрыемства Ўладзімір Шаблінскі.
У межах фестывалю на хутары Шаблі (80 км ад Мінска) выступяць паўтара дзясяткі артыстаў з розных краін, якія спалучаюць этнічную музыку з сучаснымі гучаннямі. Усе замежныя артысты фестывалю наведаюць Беларусь упершыню: Shazalakazoo (Сербія), “Комба-бакх” (Расія), Sovijus (Літва), DJ Wojcio (Польшча), “Бадьян Сауна Сістэм” (Украіна). Нашу краіну на сцэнах фестывалю будуць прадстаўляць “Нагуаль”, Gurzuf, Morfe Acoustic Band, а таксама шэраг ды-джэяў. Гледачоў таксама чакаюць гульні, кінатэатр пад адкрытым небам і іншыя забавы.
“З прычыны слабага развіцця клубнай сцэны ў Беларусі вельмі рэдка можна пабачыць гурты з блізкага замежжа, неардынарныя і вельмі цікавыя, але якія не заваявалі, а можа і не жадаюць заваёўваць месца ў эшалоне сусветных зорак. Звычайна ўсё самае цікавае знаходзіцца ўнутры пірага. Фестываль “Вольнае паветра” – гэта сумесь разынак этна-пірагоў нашай і блізкіх да нас краін”, – адзначыў арт-дырэктар фестывалю Аляксандр Багданаў.
Генеральным партнёрам этна-фестывалю “Вольнае паветра” з’яўляецца “Парфюмерна-касметычная фабрыка “Сонца” (гандлёвая марка “Мара”). Гэта сучасная айчынная вытворчасць пральнага парашку і сродкаў бытавой хіміі. Для кампаніі падтрымка фестывалю – гэта ўнёсак у папулярызацыю беларускай этна-культуры, таго глыбіннага культурнага пласта, які з’яўляецца крыніцай жыццёвай сілы народа.
Час правядзення: ад 15.00 да 6.00
Месца правядзення: хутар Шаблі, в. Мал. Запруддзе, Валожынскі р-н. – 80 км. ад Мінска ў бок Вільні. Арыенцір – в. Гародзькі.
Квіткі: 20 тыс. руб. (уваход), 50 тыс. руб. (уваход + кемпінг).
Дзе набыць: у бары “Малако” (пр. Незалежнасці 37а), каса ў пераходзе каля ГУМа, у распаўсюдніка ў пераходзе на пл.Я.Коласа (выхад да філармоніі), у касах КЗ “Мінск” (вул.Кастрычніцкая 5), а таксама ў сістэмах kvitki.by і ticketpro.by.
Даведка: (017) 280 15 10, (029) 6 5555 96, (033) 6 5555 96
