Пачатак фармацэўтычнай справы ў Слуцку быў закладзены яшчэ Багуславам Радзівілам у сярэдзіне ХVІІ стагоддзя. Гісторык Мікола Волкаў на сваёй старонцы ў Facebook распавядае пра пачаткі аптэчнай справы на беларускіх землях і ў прыватнасці, у Слуцку.

Фармацэўтыка – адна з прыкмет цывілізацыі, таму з'яўленне першых аптэк у беларускіх гарадах – з'ява для нашай гісторыі вельмі важная. Раней лічылася, першая аптэка ў Слуцку была заснавана ў 1648 г., пасля выдання Багуславам Радзівілам граматы доктару Крыштафу Вінклеру і аптэкару Маціяшу Валяр’яну Батлігеру на адпаведную дзейнасць. Але вось у рахунках знайшлося, што ўжо ў 1645 г. са сродкаў князя быў закуплены дом для аптэкі за 700 злотых. Такім чынам, слуцкую фармацэўтыку "састарылі" на 3 гады.

Важна тут адзначыць, што прыцягенне лекараў у горад, было свядомым захадам уласнікаў, для якіх было важна павысіць якасць жыцця людзей. Прычым гэта былі найбольш "прасунутыя" ў плане кантактаў з еўрапейскай цывілізацыяй людзі. Невыпадкова першая аптэка ў Беларусі згадваецца ў 1561 г. у Пінску, якім доўгі час кіравала італьянка Бона Сфорца.

Багуслава Радзівіла, канечне, на падставе пакупкі дома пад аптэку за 700 злотых не трэба лічыць адданым філантропам. Шмат грошай ён спускаў і на "прыгожае жыццё". Так, у 1646 г. яму на сядло ў армянаў набылі 2 "тыгрысаў" і 2 "лямпартаў" за 2000 злотых і атлас за 144 злотых. Але гаспадарыць ён таксама ўмеў і ставіў добрых адміністратараў, якія разумелі, што ад якасці жыцця падданых залежаць прыбыткі з маёнтку. Падаецца, вельмі прагматычны прынцып сучасных "капіталістаў".