Сярод работ — самая дарагая карціна ў Беларусі. Жамчужыны калекцыі, якую збірала яшчэ каманда Віктара Бабарыка, прадстаўлены ў Выставачнай зале і ў ратушы да 30 красавіка, піша mogilev.media.
Хаім Суцін, Юдэль Пэн, Лявон Бакст, Яўген Магарыл — вядомыя беларускія мастакі пачатку XX стагоддзя і сучасныя майстры Уладзімір Тоўсцік, Уладзімір Зінкевіч, Уладзімір Савіч, Юрый Якавенка. Гэтую экспазіцыю сабрала пад сваім дахам Выставачная зала «Музея гісторыі Магілёва», а шэдэўры прадставіў ужо які раз Белгазпрамбанк — больш за 40 карцін і скульптур.
Назва выставы «Партрэт часу», дзе кожная з работ асабліва каштоўная і з’яўляецца жамчужынай беларускага мастацтва.
Калі падрабязней аб значнасці гэтай выставы: Хайм Суцін — найбуйнейшы майстар «Парыжскай школы», на выставе прадстаўлены дзве працы — «Ева», і «Заснуўшая чытачка, Мадлен Кастэн», прычым Белгазпрамбанк у 2013 годзе набыў «Еву» на аўкцыёне «Сотбіс» за 1.805.000 долараў, яна прызнана самай дарагой карцінай у Беларусі.
Юдэль Пэн — беларускі жывапісец, вядомы дзеяч «яўрэйскага рэнесансу» ў мастацтве пачатку XX стагоддзя, вядомы як настаўнік многіх віцебскіх мастакоў, у тым ліку Марка Шагала.
Прадстаўлены партрэт Іосіфа Аляшкевіча, мастака пачатку XIX стагоддзя, які часта выязджаў у беларускія губерні, дзе зрабіў нямала цікавых партрэтаў, сябраваў з Адамам Міцкевічам. Усе астатнія, прадстаўленыя мэтры заслугоўваюць асаблівай увагі і вывучэння.
Варта адзначыць, што мастацкі збор «Белгазпрамбанка» — сапраўды ўнікальная калекцыя ў нашай краіне, над якой дзесяцігоддзямі працавала каманда спецыялістаў пад кіраўніцтвам Віктара Бабарыкі. У 2021-2022 гадах над ёй навісла пагроза, калі працы арыштоўваліся дзяржавай на фоне палітычнага крызісу ў краіне.
Частка калекцыі выстаўлена ў ратушы.
Экспазіцыя будзе працаваць да 30 красавіка. Час працы выставачнай залы: з серады па нядзелю — з 11:00 да 19:00. У панядзелак і аўторак — выходныя дні.
