17 снежня 1924 года прынята рашэнне Ураду БССР аб арганізацыі ўласнай кінавытворчасці і стварэнні для гэтага адмысловай арганізацыі «Белдзяржкіно». З таго часу 17 снежня адзначаецца як Дзень беларускага кіно.
На першым этапе здымаліся збольшага хранікальныя і навукова-папулярныя фільмы. У 1928 годзе «Белдзяржкіно» арганізавала беларускую кінастудыю мастацкіх фільмаў «Савецкая Беларусь», якая за адсутнасцю тэхнічнай базы была часова размешчаная ў Ленінградзе. У 1939 годзе кінастудыя пераехала ў Мінск. Назву «Беларусьфільм» кінастудыя атрымала ў 1946 годзе.
У 1926 годзе на кінастудыі рэжысёрам Юрыем Тарычам быў зняты першы беларускі мастацкі фільм «Лясная быль» па аповесці Міхася Чарота «Свінапас». Прэм’ера адбылася 26 снежня 1926 года ў мінскім кінатэатры «Культура». У 1932 годзе на экраны выйшаў мастацкі фільм «Слава свету» — гэта быў першы гукавы мастацкі фільм вытворчасці беларускай кінастудыі і адзін з першых гукавых фільмаў у СССР. У міжваенны перыяд большасць фільмаў беларускай кінастудыі мела агітацыйна-прапагандысцкі характар і здымалася на рускай мове.
Вытворчасьць фільмаў была прыпыненая Другой сусветнай вайной, дзейнасць аднавілі толькі ў 1946 годзе. У пасляваенны перыяд студыю празвалі «Партызанфільм» з-за выхаду вялікай колькасці стужак пра барацьбу беларускіх партызан супраць нацысцкай акупацыі. У 1973 годзе пры кінастудыі «Беларусьфільм» была створана анімацыйная студыя. Першы мультфільм, зняты на кінастудыі — «Вася Буслік і яго сябры». На дадзены момант кінастудыя «Беларусьфільм» стварыла каля 600 стужак.
Чытайце яшчэ:
17 беларускіх фільмаў і серыялаў, якія хутка павінны з’явіцца на экране
Cімфонія раз’яднання. Як дзяржава за некалькі месяцаў дэвальвавала кінафестываль «Лістапад»
АМ, budzma.org
